Орусиялык шайлоочулар президент Владимир Путиндин “Бирдиктүү Орусия” партиясы жеңет деп күтүлүп жаткан үч күндүк парламенттик шайлоодо добуш бере башташты.
Орус парламентинин төмөнкү палатасы Думадагы 450 орундун ээлерин аныктай турган шайлоонун жекшемби күнү саат 21.00гө (GMT 18.00) чейин созулушу жана алгачкы жыйынтыктардын дароо жарыяланышы күтүлүүдө.
2022-жылдын февраль айында Украинада масштабдуу чабуулдарды баштаган Орусия андан бери биринчи жолу шайлоо өткөрүүдө. Шайлоо Украинанын Орусия басып алган жана аннексиялап алган чыгыш аймактарында да өтүүдө.
Орус шайлоочулары жана талдоочулары азыркы Думада ансыз деле көпчүлүктү түзгөн президенттин партиясы “Бирдиктүү Орусия” шайлоодо жеңип, мыйзам чыгаруу органындагы үстөмдүгүн сактап калат деп күтүшүүдө.
Шайлоого «Бирдиктүү Орусиядан» тышкары Владимир Путинди жана Украинадагы жаңжалдын ар кандай деңгээлде уланышын колдогон партиялар гана — КПРФ коммунисттери, ЛДПР улутчулдары, «Адилеттүү Орусия» консерваторлору жана «Жаңы адамдар» либералдары— катышууга уруксат алышкан.
Шаршемби күнү кечинде телекөрсөтүү аркылуу кыскача сүйлөгөн сөзүндө орус президенти өз жарандарын добуш берүүгө чакырып, “Сиздердин тандооңуздар жана чечкиндүүлүгүңүздөр Украинадагы жаңжалда миллиондогон адамдар биздин согушкерлерди колдой турганын жана бирдиктүү экенибизди дагы бир жолу көрсөтөт” деди.
Экинчи жагынан, шайлоого катыштырылбаган сүргүндөгү оппозиция өзүнүн сан боюнча күчүн көрсөтүү үчүн «согушка каршы болгон бардык орустарды» ошол эле күнү жана бир убакта – 20-сентябрда түштө Владимир Путиндин партиясына каршы добуш берүүгө чакырды.
