Германиянын канцлери Фридрих Мерц менен АКШнын президенти Дональд Трамп жума күнкү биринчи телефондук сүйлөшүүсүндө, Украинадагы согушту токтотуу үчүн кызматташтыкты бекемдөө зарылдыгын баса белгилешти.
Өкмөттүн жаңы дайындалган басма сөз катчысы Стефан Корнелиус өз билдирүүсүндө, эки лидердин тең “Украинадагы согушту токтотуу үчүн тыгыз кызматташуунун” маанилүүлүгүндө бирдей пикирде экенин айтты.
Корнелиус Мерцтин Трамптын Орусия-Украина согушун тез арада токтотуу чакырыгына да кошулганын билдирди.
"Орусия азыр сүйлөшүүлөргө мейкиндик түзүү үчүн ок атышууну токтотууну кабыл алышы керек" деген Корнелиус Кремлди тез арада чара көрүүгө чакырды.
“Трамп Германиянын, Франциянын, Улуу Британиянын, Польшанын жана башка европалык өнөктөштөрдүн аймакта туруктуу тынчтыкты издөө аракеттерин “күчтүү түрдө” колдоого убада берди”, деп билдирди Корнелиус.
Эки лидер ошондой эле үзгүлтүксүз сүйлөшүүлөрдү улантууга жана АКШ менен Германияга өз ара сапарларды пландаштырууга макулдашышты.
Консервативдик лидер Мерц, шейшемби күнү Германиянын 10-канцлери катары кызматка киришкенден кийин шаршемби күнү Парижде Франциянын президенти Эммануэль Макрон менен өткөргөн биргелешкен маалымат жыйынында Трамптын ок атышууну токтотуу демилгесин толук колдой турганын билдирген.
Тыгыз кызматташтык
Фридрих Мерц: “Ачык айтайын: Президент Трамптын бул согушту бүтүрүү жана Украинадагы кыргындарды токтотуу аракетин толук колдойбуз”, – деди.
“АКШ, Украина жана Европадагы өнөктөштөрүбүз менен биргеликте адилеттүү, туруктуу жана узак мөөнөттүү тынчтык үчүн тыгыз иштешебиз. Ок атышууну токтотуу макулдашылгандан кийин АКШнын жетекчилиги жана катышуусу менен ага байкоо жүргүзүүгө салым кошууга даярбыз”, – деп кошумчалады.
Мерц жакынкы апталарда Украинанын борбор шаары Киевге барууну пландап жатканын жана Германиянын Украинага колдоосун дагы бир ирет ырастай турганын жарыялады.
Украинага берилиши мүмкүн болгон коопсуздук кепилдиктери тууралуу суроого жооп берген премьер-министр, майда-чүйдөсүнө чейин айтууга али эрте экенин билдирди.
“Туруктуу ок атышпоо жана Орусия менен тынчтык келишими түзүлбөстөн, Украинаны кандай деңгээлде коопсуздук кепилдиктери менен камсыздай аларыбыз тууралуу маалымат бере албайбыз, анткени шарттар азырынча белгисиз”, – деди ал журналисттерге.
“Биздин көз карашыбыз боюнча Америка Кошмо Штаттарынын бул жараянга жана келечекте Украинага карата коопсуздук кепилдиктеринин алкагына катышуусу абдан маанилүү. Эң башкысы бул согуш биротоло токтотулушу керек; азыркыдай бир нече күнгө гана токтотулбашы керек”, – деп кошумчалады ал Орусиянын президенти Владимир Путиндин 8-майдан 11-майга чейин үч күндүк ок атышпоо жарыясына шилтеме кылып.
