Европа Биримдигинин институттары 2025-жылдын 21-августундагы ЕБ-АКШ биргелешкен билдирүүсүнүн тарифтерге тиешелүү бөлүктөрүн ишке ашыруу боюнча эки регламент боюнча убактылуу келишимге жетишти. Бул трансатлантикалык соода пакетинин айрым бөлүктөрүн расмийлештирүү жана эки өнөктөш ортосундагы экономикалык байланыштарды чыңдоо багытындагы маанилүү кадам катары каралууда.
Европа Биримдиги Кеңешинин төрагалыгы менен Европа Парламентинин ортосунда жетишилген келишим ЕБ менен АКШнын ортосунда туруктуу жана алдын ала болжолдоого боло турган соода мамилелерин камсыз кылууну көздөйт. Ошондой эле Европа Биримдигинин экономикалык кызыкчылыктарына коркунуч жаралган учурда, буга тийиштүү жооп кайтарууга мүмкүндүк берүүчү кепилдиктерди түзүүнү максат кылууда.
Темага байланыштуу жасалган билдирүүгө ылайык, биринчи регламент АКШнын өнөр жай товарларына карата калган бажы алымдарын (тарифтерин) жокко чыгарат. Муну менен бирге, тарифтик квоталарды, айрым деңиз азыктарын жана сезгич эмес айыл чарба товарларын камтыган америкалык кээ бир экспорттук өнүмдөр үчүн жеңилдетилген мүмкүнчүлүктөрдү кеңештет.
Экинчи регламент болсо омарды (деңиз чаянын), анын ичинде кайра иштетилген омарды импорттоого колдонулган бажы алымдарын токтото туруу мөөнөтүн узартат.
Убактылуу келишим юридикалык жана техникалык жактан акыркы вариантына келтирилгенден кийин, ЕБ Кеңеши жана Европа Парламенти тарабынан расмий түрдө жактырылышы керек.
Бул эрежелер Расмий гезитке жарыяланган күндүн эртесинен тарта күчүнө кирет.
Омарга байланыштуу чечим 2025-жылдын 1-августунан тартып ретроактивдүү түрдө колдонулат.
