Түркия Республикасынын Улуттук Коргоо министрлиги (УКМ) Тегеран жана Вашингтон администрациялары убактылуу ок атышууну токтотууну туруктуу кылуу жана тынчтык сүйлөшүүлөрүн улантуу үчүн «конструктивдүү» мамиле жасашат деген үмүтүн билдирди.
Министрликтин басма сөз катчысы, контр-адмирал Зеки Актүрк бейшемби күнкү жумалык маалымат жыйынында: «Биз Иран менен АКШнын убактылуу ок атышууну токтотууну туруктуу кылуу жана сүйлөшүү процессин улантуу үчүн акылдуулук менен конструктивдүү аракет кылуусун каалайбыз. Региондо туруктуулукту жана тынчтыкты орнотуу үчүн ар кандай колдоо көрсөтүүнү улантабыз», — деди.
Актүрк ошондой эле сүйлөшүү процесстери жүрүп жатканына карабастан, Израилдин Ливанга жасаган чабуулдарына жана Газадагы геноцидден улам келип чыккан гуманитардык кризиске каршы эл аралык коомчулуктун жоопкерчиликти алышы керектигин дагы бир жолу белгиледи.
Мындан сырткары, Улуттук коргоо министри Яшар Гүлер ушул аптада Стамбулда өткөн SAHA 2026 коргонуу көргөзмөсүнүн алкагында Сомали, Косово, Кения, Кувейт, Мавритания, Судан жана Эстониялык кесиптештери баш болгон көптөгөн чет элдик коргонуу тармагынын жетекчилери менен жолугушканы айтылды.
Бул жолугушуулардын алкагында министр Гүлер Косово менен аскердик-финансылык кызматташтык келишимине, ал эми Кения менен коргонуу тармагындагы кызматташтык келишимине кол койду.
Басма сөз катчы Актүрк түрк куралдуу күчтөрүнүн жогорку даражалуу командирлиеринин да көргөзмө учурунда чет элдик өкүлдөр менен жолугушканын кошумчалады.
Ошондой эле, аба күчтөрүнүн командири, армиянын генералы Зия Жемал Кадыоглунүн 11-14-май күндөрү Португалияга иш сапары менен бара тургандыгы, ал эми деңиз күчтөрүнүн командири адмирал Кадир Йылдыз Мадридде өтүп жаткан жана жума күнү аяктай турган «2026 Европанын деңиз күчтөрүнүн командирлеринин конференциясына» (CHENS) катышып жаткандыгы тууралуу маалымат бөлүшүлдү.
