Иран Израилдин Сириядагы акыркы соккуларын айыптап, бул кол салуулар эл аралык тынчтыкка жана коопсуздукка мурда болуп көрбөгөндөй коркунуч жаратып жатканын айтты.

Ирандын Тышкы иштер министрлигинин басма сөз катчысы Исмаил Бекаи, Ислам Кызматташтык Уюму (ИКУ) менен Бириккен Улуттар Уюмун (БУУ) Израилдин күчөгөн кол салууларына каршы тез жана чечкиндүү чара көрүүгө чакырды.

“Бүгүнкү күндө ар бир адам сионисттик режимдин аймактагы тынчтык жана ырааттуулук үчүн эң чоң коркунуч экенин ачык көрүп турат”, – деген Бекаи, Израилди “Сириянын коомдук инфраструктурасын бутага алып, оккупациясын тереңдетип жатат” деп айыптады.

“Бул режим АКШнын жана башка Батыш өлкөлөрүнүн, өзгөчө Германия, Улуу Британия, Франциянын аскердик жана саясий колдоосунан пайдаланып, эл аралык тынчтык менен коопсуздукка мурда болуп көрбөгөндөй коркунуч жаратууда”, – деп кошумчалады.

Бекаи ошондой эле эл аралык коомчулуктун Израилдин Газага каршы согушун токтото албашынын Тель-Авивдин кеңири аскердик операциясын күчөтүүгө түрткү болгонун айтты.

ИКУну жана БУУну Израилдин аймактагы чагымчылдыктарын жана кеңейүүчүлүк амбицияларын токтотуу үчүн “тез жана натыйжалуу” чараларды көрүүгө чакырды.

Ирандын тышкы иштер министри Аббас Аракчи да бул эскертүүнү кайталап: “Тилекке каршы, бул кырдаалды алдын ала айтууга болот эле. Кезектеги борбор шаар кайсынысы?” – деп сурады.

“Израиль режими эч кандай чек тааныбайт жана бир гана тилди түшүнөт. Бүткүл дүйнө анын көзөмөлсүз агрессиясын токтотуу үчүн биригиши керек” деди.

Ал кошумчалагандай, “Иран Сириянын эгемендигин жана аймактык бүтүндүгүн колдойт жана ар дайым сириялыктардын жанында болот”.