Украинанын президенти Владимир Зеленский АКШнын президенти Дональд Трамп менен телефон аркылуу бейшемби күнү Швейцарияда өтө турган эки тараптуу сүйлөшүүлөрдө карала турган темаларды талкуулагандарын билдирди.
X баракчасында жарыяланган билдирүүдө Зеленский атайын өкүл Стив Виткофф жана Трамптын күйөө баласы Жаред Кушнер да сүйлөшүүгө катышканын, алар ошондой эле "марттын башында" Москва, Киев жана Вашингтондун ортосундагы кийинки үч тараптуу тынчтык сүйлөшүүлөрүнө даярдык көрүүнү да талкуулашканын айтып мындай деп кошумчалады:
"Бул жыйын сүйлөшүүлөрдү лидерлер деңгээлине көтөрүүгө мүмкүнчүлүк түзөт деп күтүп жатабыз. Трамп бул кадамдарды колдойт. Бул бардык татаал жана сезимтал маселелерди чечүүнүн жана акыры согушту токтотуунун бирден-бир жолу".
Украиналык жана америкалык топтордун "интенсивдүү" иштеп жатканын айткан Зеленский аларга бардык аракеттери, сүйлөшүүлөргө активдүү катышуусу жана согушту токтотуу аракеттери үчүн ыраазычылык билдирип, "Биз ошондой эле PURL (Украинанын артыкчылыктуу муктаждыктарынын тизмеси) демилгесине чоң маани беребиз. Бул кыш Украина үчүн эң оор кыштардын бири болду, бирок АКШдан сатып алган абадан коргонуу системалары үчүн ракеталар бизге бул кыйынчылыктарды жеңүүгө жана өмүрдү коргоого жардам берип жатат" деди.
Токтоп калган сүйлөшүүлөр
Буга чейин Зеленский бейшемби күнү АКШнын өкүлдөрү менен Украинанын башкы сүйлөшүүчүсү Рустем Умеровдун ортосунда жолугушуу болорун жарыялаган; бул жолугушууда эки өлкөнүн Украина үчүн "Тынчтык пакети" менен катар ар кандай маселелерди талкуулай турганын айткан.
"Мен жаңы эле Рустем Умеров менен сүйлөштүм. Эртең ал америкалык сүйлөшүүчүлөр Виткофф жана Кушнер менен жолугушат", - деген Зеленский Умеровду биринчи жолу экономика министри Алексей Соболев коштоп бараарын кошумчалады.
Сүйлөшүүлөр өткөн жылдын аягында жарыяланган америкалык планга негизделген жана негизинен Украинанын чыгышындагы, чыр-чатактын борбору болгон өнөр жай аймагы Донбасстын тагдыры боюнча туңгуюкта турат.
Орусия Украинанын чыгышындагы Донецк облусун толук көзөмөлдөөнү талап кылып, эгер Киев сүйлөшүү столунда баш тартпаса, аймакты күч менен басып алам деп коркутууда.
Бирок Украина бул талапты четке кагып, Орусиянын кайрадан кол салуусуна тоскоол боло турган коопсуздук кепилдиктери жок келишимге кол койбой турганын билдирди.
