Өзбекстан сенатынын 19-пленардык жыйынында 7-июлда Парламенттин Мыйзам чыгаруу жыйыны тарабынан талкууланып, сенатка жөнөтүлгөн алфавит жөнүндөгү мыйзам долбоору каралды.

Сенаттын пленардык жыйынында кабыл алынган мыйзамга ылайык, жаңы өзбек алфавити 28 тамгадан жана апострофтон (') туруп, азыркы 26 тамганын жана 3 тамгалардын айкалышынын ордуна колдонулат.

Түзөтүүдө учурда "o'", "g'", "sh" жана "ch" катары колдонулуп жаткан тамгалар жана тамгалардын айкалыштары тиешелүүлүгүнө жараша "ö", "ğ", "ş" жана "ç" деп жазылаары белгиленди. Жаңы алфавиттен "ng" тамга айкалышы алынып салынат деген чечим кабыл алынды.

Бул өзбек алфавитинин түрк дүйнөсүндөгү, айрыкча Түркиядагы латын алфавитин колдонгон алфавиттерге окшоштугун жогорулатууга багытталган.

Жаңы жобо күчүнө киргенден кийин азыркы алфавитти колдонууга байланыштуу өткөөл мезгил киргизилет.

Мыйзамды ишке ашыруу үчүн даярдалуучу иш-аракеттер планында көрсөтүлгөн мөөнөттөргө чейин расмий документтерде, мамлекеттик мекемелердин жана уюмдардын логотиптеринде, акча бирдиктеринде, белгилерде жана башка айрым элементтерде азыркы алфавитти колдонууга уруксат берилет.

Сенат тарабынан бекитилген мыйзам президент Шавкат Мирзиёевге бекитүү үчүн жөнөтүлдү. Жаңы алфавит президент мыйзамга кол койгондон кийин күчүнө кирет.