Президенттиктин коммуникация башкармалыгынын төрагасы Бурханеттин Дуран дүйшөмбү күнү жасаган билдирүүсүндө Тель-Авив администрациясынын басып алынган Батыш Шерианын айрым аймактарын Израилдин "мамлекеттик менчигине" айландыруу чечимин катуу айыптады.
Дуран бул кадамды "эл аралык укукту ачык бузуу" деп мүнөздөп, "адамзаттын жалпы абийирине каршы экедигин жана геноциддик саясаттын уландысы" деген мааниге келгенин билдирди.
Ал мындай демилгелер аймактагы адилетсиздикти тереңдетип, тынчтыкка, аймактык тынчтыкка жана коопсуздукка болгон үмүттү атайылап бутага алаарын баса белгилеп: "Палестина элинин тарыхый жана мыйзамдуу укуктарын этибарга албаган жана демографиялык, укуктук түзүмдү өзгөртүүгө багытталган бул мамиле аймактагы туруктуулукка карата эң чоң тоскоолдуктардын бири болот",- деп кошумчалады.
Дуран билдирүүсүн түрк социалдык медиа платформасы NSosyal аркылуу жарыялады.
Палестинанын жерлерин басып алуунун бардык түрлөрүн четке кага тургандарын билдирген Дуран эл аралык коомчулукту "бул мыйзамсыздыкты токтотуу жана эки мамлекеттүү чечимге негизделген туруктуу тынчтыкты орнотуу" үчүн жоопкерчиликти алууга чакырды.
«Түркия катары, президентибиз Режеп Таййип Эрдогандын жетекчилиги астында биз эл аралык укукка жана адам укуктарына негизделген адилеттүү чечимди жактоону жана палестиналык боордошторубуздун адилеттүү ишин колдоону улантабыз», - деди.
Бул билдирүү мурунку күнү Израиль өкмөтү Палестинанын Батыш Шериадагы аймактарын «мамлекеттик менчик» катары каттоо сунушун бекиткенден кийин жасалды.
Израилдин мамлекеттик телеканалы сунушту каржы министри Бецалел Смотрич, юстиция министри Ярив Левин жана коргоо министри Исраэль Кацтын киргизгенин билдирди.
Палестиналыктар бул кадамдарга Батыш Шерианы расмий түрдө аннексиялоого алып баруучу процесстин башталышы жана аймактын көпчүлүк бөлүктөрүн иш жүзүндө аннексиялоого карай жылуу катары карашууда. Алар бул демилгелер Бириккен Улуттар Уюму тарабынан да колдоого алынган эки мамлекеттүү чечим алкагын алсыратаарын белгилеп жатышат.
