Орусия Украинанын Донецк облусунун батышындагы дагы бир айылын каратып алганын билдирип, аскерлери коңшу Днепропетровск облусуна карай жылып бара жатканын белгиледи.

Орусия менен Украинанын ортосундагы согуш үч жылдан ашык убакыттан бери уланып келет. Бул жайда чабуулдар күчөп, АКШ баштаган сүйлөшүүлөр азырынча согушту токтотууга жыйынтык берген жок.

Жекшемби күнү Орусиянын Коргоо министрлиги орус аскерлери Мирное айылын басып алганын билдирди. Бул айыл Советтер Союзу учурундагы аты менен “Карл Маркс” деп да аталат.

Айыл Донецк жана Днепропетровск облустарынын административдик чек арасына жакын жайгашкан. Министрлик аскерлер “душмандын коргонуу аймагына терең кирип” айылга ээ болгонун билдирди.

Мирное – Москва жекшемби күнү басып алган эки айылдын бири. Буга чейин Орусиянын Коргоо министрлиги Донецк облусунун чыгышындагы Николаевка айылын да басып алганын билдирген.

‘Орус жоочулары’

Ошол эле учурда, Украина Киев облусунда Орусиянын жашыруун кызмат агенттери жок кылынганын билдирди. Бул операция Украинанын СБУ чалгындоо кызматы тарабынан өткөн жумада СБУ полковнигин атып өлтүргөн деп шектелгендерди кармоо максатында жүргүзүлгөн.

СБУ Telegram социалдык тармагындагы билдирүүсүндө, Киевде бейшемби күнү СБУ полковниги Иван Воронычты өлтүрүүгө Орусиянын Федералдык коопсуздук кызматынын (ФСБ) агенттери жооптуу деп эсептегенин жана жекшемби күнү аларды кармоого аракет кылганын айтты.

СБУ Воронычты өлтүрүүгө шектелген эки адам – бир эркек жана бир аял бар экенин билдирди. Бирок жекшемби күнкү окуяда канча ФСБ агенттери жок кылынганы тууралуу маалымат берген жок.