Украинанын президенти Владимир Зеленский өлкөсүнүн согушта Орусиянын "агрессор тарап" экени темасында АКШ менен жалпы түшүнүккө келүүнү каалаганын билдирип, Киевдин Вашингтонду негизги стратегиялык өнөктөш катары көргөнүн баса белгиледи.
“Биз АКШнын бул жаңжалда ортомчу позицияны ээлегенин билебиз. Бул АКШнын тандаган жолу,” – деди ал Interfax-Ukraine агенттигине берген интервьюсунда америкалык журналист Бен Шапирого.
“Бирок биз АКШны таасирдүү стратегиялык өнөктөш катары эсептейбиз,” – деп кошумчалады. Украинанын президенти ошондой эле: "Бул эки күч Орусияга каршы колдонулушу керек деп ойлойбуз, анткени Орусия агрессор. Жана биз эмес, Орусия агрессор экени тууралуу жалпы түшүнүккө ээ болгубуз келет" деди.
Зеленский АКШнын президенти Дональд Трамптын жаңжалды чечүү боюнча башкача жолду тандаганын айтты. “Мен президент Трамптын эмнени каалап жатканын түшүнөм. Анын өзүнүн ыкмасы бар экенин сыйлайм,” – деген Зеленский Украина бул темада Вашингтондун “тең салмактуулук издөөсүн” каалабаганын баса белгиледи.
Зеленский ошондой эле Украинанын АКШ курал системаларынын колдонулушу жана өнүктүрүлүшү темасында ачык иш алып барганын айтып, украиналык адистердин америкалык өнөктөштөр менен биргеликте бир катар технологияларды иштеп чыкканын билдирди.
"Украина колдонгон нерселердин баары Америка Кошмо Штаттарына билдирилди жана Украина, инженерлерибиз жана адамдарыбыздын жардамы менен көптөгөн элементтерди жана өзгөчөлүктөрдү иштеп чыкты" деди украин лидери.
Президенттин айтымында, АКШ “акыркы жылдардагы эң чоң кургактык согушунун” негизинде ишенимдүү жана маанилүү маалыматтарды чогултту. Бул Вашингтонго келечектеги инвестициялык муктаждыктарды жакшыраак түшүнүүгө жардам берди.
Зеленский АКШнын 105 миллиард долларлык жардамынын бир бөлүгү жаңы учкучсуз учуучу аппараттарды иштеп чыгууга жумшалганын жана бул аракеттер биргелешкен аскердик-техникалык өнүгүүлөргө салым кошконун айтты.
"Окумуштуулар, чалгынчылар, аскердик инженерлер мына ушулардын үстүндө иштешти, АКШ ошонун үстүндө иштеди. АКШ булар үчүн акча төлөгөндө, учкучсуз аппараттар тууралуу толук жана ачык маалымат алды. Бул АКШда мурда жок болгон жаңы курал эле... Эми АКШда бул тажрыйбанын баары бар", - деп кошумчалады.
