Түркиянын энергетика жана жаратылыш ресурстары министри Алпарслан Байрактар бейшемби күнү Чагры Бей бургулоочу кемеси Сомалиге барганын жарыялады.
Байрактар түрк социалдык медиа платформасы NSosyalдагы баракчасында: "Чагры Бей кемеси тарыхый миссиясы үчүн Сомалиге барды",- деп жазып, Түркия менен Сомалинин энергетика тарыхында таптакыр башка барак ачылаарын белгиледи.
Министр Түркиянын чет өлкөдөгү алгачкы терең деңиз бургулоо кампаниясы башталганын жарыялап: «Чек араларыбыздан тышкары жердеги алгачкы терең деңиз бургулоо операциябыз үчүн Жараткандан ырайымын тилейбиз», — деди.
Ушул айдын башында министр кеменин жума күнү барышы керектигин айткан; бул да Түркиянын Африка мүйүзү сууларында биринчи ачык деңиз бургулоо операциясынын башталышын белгилей турганын билдирген.
"Чагры Бей" дүйнөдөгү экинчи эң терең деңиз кудугун бургулайт.
Түркия "Оруч Рейс" кемесинин Сомалинин жээгинде жүргүзгөн сейсмикалык изилдөөлөрүнүн натыйжасында мүмкүн болуучу бургулоо аймагы аныкталгандан кийин, чет өлкөдөгү биринчи терең деңиздеги издөө бургулоо миссиясын баштады.
Изилдөө кемеси 234 күндүк изилдөө учурунда 4464 чарчы километр аянттан маалымат чогултту.
Чогулган маалыматтарды талдоодон кийин, "жетинчи муундагы ультра терең суу бургулоочу кеме" "Чагры Бей" Могадишонун жээгинен 372 чакырым алыстыкта жайгашкан CURAD-1 кудугун бургулоо үчүн даярдалган.
Операция 7500 метр тереңдикке багытталат жана дүйнөдөгү экинчи эң терең деңиз кудугу болушу мүмкүн.
Кудуктун аты сомали тилинде үй-бүлөдөгү тун бала дегенди билдирген Кураддан алынган.
Жалпысынан 288 күнгө созулушу күтүлүп жаткан бул операцияга болжол менен 500 кызматкер катышат. Коопсуздукту камсыздоо үчүн энергетикалык флоттун үч жардамчы кемеси жана Түркиянын деңиз күчтөрүнүн бөлүктөрү колдоо көрсөтөт.
