Тропикалык “Гезани” циклону Мадагаскардын чыгыш жээгине таасир этип, аралдын Индия океанындагы экинчи чоң шаары Тоамасинада тогуз адамдын өмүрүн алды. Бийлик катуу шамал жана нөшөрлөгөн жамгырдан улам кеңири кыйроолор болгонун билдирди.
Мадагаскардын апаат коркунучу жана башкаруу кеңсеси шаршемби күнү Гезанинин жээктеги конуштарды уруп өткөндөн кийин Тоамасина порт шаарынын айланасындагы аймакта 19 адам жаракат алганын жана болжол менен 1500 адам эвакуацияланганын кабарлады.
Тоамасина жана тегерегиндеги аймактардын тургундары циклондун жээкке келиши менен дүрбөлөң жаралганын билдиришти. Хариманга Ранайво: "Мен өмүрүмдө мындай катуу шамалды көргөн эмесмин... Эшиктер жана терезелер металлдан жасалган, бирок катуу солкулдап жатат", - деди.
Бириккен Улуттар Уюмунун Гуманитардык иштерди координациялоо боюнча башкармалыгынын маалыматына караганда, “Гезани” быйыл Мадагаскарды уруп өткөн экинчи бороон болду. Он күн мурун тропикалык Фития бороону 14 адамдын өмүрүн алып, 31 000ден ашуун адамды үй-жайсыз калтырган.
Гезаниде шамалдын ылдамдыгы саатына 185 чакырымга (115 миль) жетти. Циклонго чейин бийлик мектептерди жаап, шашылыш баш калкалоочу жайларды даярдаган.
Каттуу шамал айрым үйлөрдүн кулашына, чатырлардын учушуна, дубалдардын талкаланышына жана электр зымдарынын үзүлүшүнө алып келди.
Шаршемби күнү эртең менен Мадагаскардын метеорологиялык кызматы Гезани орточо тропикалык бороонго чейин алсырап, борбор шаар Антананаривудан 100 чакырым түндүктө батышка карай ички аймактарга жылып баратканын жарыялаган.
