Покхарадан Непалдын борбору Катмандуга бара жаткан жүргүнчү ташуучу автобус Дхадинг районундагы Тишули дарыясына кулап, кеминде 17 адам каза болду, 24 адам болсо жаракат алды.
Непалдын Куралдуу полиция күчтөрүнүн маалыматына караганда, кырсык жекшемби күнү саат 19:45те (GMT) болду.
Полиция күчтөрүнүн өкүлү Бишну Прасад Бхатта бардык коопсуздук күчтөрүнүн көптөгөн кызматкерлери куткаруу иштерин улантып жатканын билдирди.
Куткаруу топтору каза болгондордун ким экенин аныктоого аракет кылып жатышат, ал эми жаракат алган жүргүнчүлөр жакын жердеги ооруканаларга жеткирилүүдө.
Кырсыктын себеби азырынча аныктала элек.
Тоолуу өлкө болгон Непалда инфраструктуранын жетишсиздигинен, эскирген унаалардан жана татаал жер кыртышынан улам жол кырсыктары көп катталат.
