Европа Биримдиги (ЕБ) Украинанын каржылоо муктаждыктарын канааттандыруу жана реформаларын колдоо үчүн 2,9 миллиард евро жаңы каржылоо бөлдү.
Европа Биримдиги Комиссиясы Украинанын экономикасын калыбына келтирүү, реформалар жана мүчөлүк процессин колдоо үчүн түзүлгөн каржылык жардам программасынын алкагында жаңы колдоону жарыялады.
Билдирүүдө: "Украинага каржылоо муктаждыктарын колдоо жана мамлекеттик башкаруунун үзгүлтүксүз иштешин камсыз кылуу үчүн 2,9 миллиард евро берилди", - деп айтылды.
Сөз болуп жаткан сумманын 800 миллион евролук бөлүгү жалпысынан 90 миллиард евролук "Украинаны колдоо насыясы" программасынан камсыздалганы белгиленген билдирүүдө төлөм Украина сот, финансы рыноктору, ишкердик чөйрө, энергетика, транспорт, айыл чарба жана жашыл трансформация сыяктуу тармактарда реформаларды ишке ашыргандан кийин жасалганы белгиленди.
Билдирүүдө жылдын калган бөлүгүндө Украинага 33,7 миллиард евро каржылык колдоо көрсөтүлүшү мүмкүн экени, анын ичинен 16,6 миллиард евро коргонуу өнөр жайынын кубаттуулугуна жана 17,1 миллиард евро бюджетти колдоого бөлүнөөрү айтылган.
Ошондой эле кошумча төлөмдөр Украинанын макулдашылган реформаларды жана саясаттын шарттарын аткарышына жараша болору билдирилди.
Украинага каржылык жардам программасы 2024-2027-жылдар аралыгында өлкөнүн каржылык туруктуулугун, калыбына келишин жана модернизациясын колдоо үчүн 50 миллиард евродон ашык гранттарды жана насыяларды берет.
Европа Биримдигинин 2026 жана 2027-жылдарды камтыган Украинага колдоо көрсөтүү кредити программасы, Украинанын коргонуу жөндөмдүүлүгүн жана коргонуу өнөр жайын бекемдөө үчүн 60 миллиард евро, мамлекеттин иштеши жана негизги мамлекеттик кызматтарды улантуу үчүн 30 миллиард евро бюджеттик колдоо, жалпысынан 90 миллиард евро каржылоону камтыйт.
