Москва менен Киев согуш башталгандан берки эң ири туткун алмашууну өткөрүштү. Ишемби күнү эки тарап тең 246 аскер туткунун алмаштырганын Орусиянын Коргоо министрлиги билдирди.
Орусия министрлигинин билдирүүсүндө «Орус аскер кызматкерлери учурда Беларуста психологиялык жана медициналык жардам алып жатышат, кийин алар дарылануу жана реабилитациялоо үчүн Орусияга жөнөтүлөт», - деп айтылды.
Министрлик ошондой эле жакшы ниеттин белгиси катары тараптар оор жарадар болгон жоокерлерди да алмашканын билдирди. Бул алкакта 31 украин аскери 15 орус аскерине алмаштырылды.
Министрлик Бириккен Араб Эмирликтеринин бул туткундарды алмашууга көмөктөшүүдөгү ортомчулук аракеттерин жогору баалады жана маанилүү гуманитардык салымы үчүн ыраазычылык билдирди.
Орусия Украинанын дагы бир айылын басып алды.
Орусия ишемби күнү Украинанын чыгышындагы Донецк облусундагы дагы бир айылды акыркы 24 саатта басып алганын ырастады.
Коргоо министрлигинин маалыматына караганда, орус күчтөрү Донецк облусундагы Шевченко конушунда көзөмөлдү орнотту.
Министрлик Украинанын Сапсан тактикалык ракеталык комплексинин жана аны коргогон Норвегияда жасалган NASAMS абадан коргонуу системаларынын сыноо полигонуна жогорку тактыктагы кургактык жана деңиз куралдары жана учкучсуз учуучу аппараттар менен топтук чабуул жасаганын билдирди.
«Чабуул ийгиликтүү ишке ашты. Белгиленген бардык буталар атылды»,-деп айтылды.
Кошумча маалыматка караганда, Орусиянын абадан коргонуу системалары акыркы 24 саатта 6 JDAM башкарылган аба бомбасына, үч HIMARS ракетасына жана 151 учкучсуз учуучу аппараттка бөгөт койгон.
Украина азырынча бул айтымдар боюнча билдирүү жасай элек.
