Түркиянын Тышкы иштер министри Хакан Фидан аймактагы акыркы кырдаалды Азербайжан жана Катардын тышкы иштер министрлери менен талкуулады.
Дипломатиялык булактардын маалыматына караганда, Фидан жума күнү Катардын Премьер-министри жана Тышкы иштер министри Мухаммед бин Абдуррахман Аль Сани жана Азербайжандын Тышкы иштер министри Жейхун Байрамов менен өз-өзүнчө телефон аркылуу сүйлөштү. Сүйлөшүүлөрдүн жүрүшүндө министрлер Түркияга багытталган ракеталык чабуулдарга байланыштуу тилектештик жана колдоолорун билдиришти.
Түркиянын Улуттук коргоо министрлиги буга чейин Ирандан атылып, түрк аба мейкиндигине кирген баллистикалык ракетанын Жер Ортолук деңизинин чыгышында жайгашкан НАТОнун аба жана ракетага каршы коргонуу бөлүктөрү тарабынан жок кылынганын жарыялаган. Бул АКШ менен Израилдин Иранга каршы согушу башталгандан бери катталган үчүнчү окуя болду.
Эскерте кетсек, Израиль менен АКШ 28-февралда Иранга каршы биргелешкен чабуул баштаган. Бул чабуулдардын натыйжасында ушул кезге чейин араларында Ирандын диний лидери Али Хаманеи болгон 1300гө жакын адамдын каза болгону маалымдалды.
Тегеран жооп катары Израилди, Иорданияны, Иракты жана АКШнын аскердик күчтөрү жайгашкан Перс булуңундагы өлкөлөрдү дрондор жана ракеталар менен бутага алган чабуулдарды жасады. Бул чабуулдарда адам өлүмү катталып, жарандык инфраструктура да зыянга учурады.
