АКШ президенти Дональд Трамп Израиль менен Палестинанын каршылык көрсөтүүчү тобу ХАМАСтын ортосундагы Газа боюнча ок атышууну токтотуу келишими жакында түзүлөт деп үмүттөнөөрүн билдирди.
“Газа боюнча сүйлөшүүлөр жүрүп жатат жана биз бул маселени алдыдагы жумада чечебиз деп үмүттөнөм,” – деп Трамп жекшемби күнү Мэриленд штатындагы Эндрюс аскер базасында журналисттерге билдирди.
Трамп буга чейин Израиль Газада 60 күндүк ок атышууну токтотуу үчүн зарыл шарттарды кабыл алганын жарыялаган. Бул сунуш ХАМАСка Катар жана Египет тарабынан жеткирилген.
ХАМАС бул сунушту оң баалап, ок атышууну токтотуу келишимин ишке ашыруу жана туткундарды алмашуу боюнча сүйлөшүүлөрдү улантууга даяр экенин билдирди.
Израиль ХАМАСтын Катар сунушуна киргизген өзгөртүүлөрүн кабыл алгыс деп эсептесе да, анын делегациясы сүйлөшүүлөр үчүн Дохага барды.
Дохадагы сүйлөшүүлөр 60 күндүк убактылуу ок атышууну токтотуу, 10 тирүү жана 18 каза болгон израилдик туткундарды бошотуу жана туруктуу тынчтык келишими боюнча талкууларга багытталган.
Көптөгөн маселелер чечилгени айтылганы менен негизги талаш Израилдин Газанын айланасындагы буфердик зонага көзөмөлдү сактап калуу талабында калды.
Ок атышууну токтотуу келишимине жетишилсе да, Израиль Рафах аймагында аскердик катышуусун улантып, палестиналыктарды башка өлкөлөргө көчүрүү максатында “жыйноо лагерин” түзүү пландарын жарыялады.
