Гонконгдун Тай По районундагы сегиз имараттан турган турак жай комплексинде чыккан өрттөн каза болгондордун саны 44 адамга жетти, ал эми 279 киши дайынсыз бойдон калууда.
Жабыркагандардын саны өсүүдө деп кабарланууда, бул тууралуу South China Morning Post (SCMP) жазды.
Өрт шаршемби күнү түшкө маал 1900дөн ашык батир жайгашкан комплекстин ичинде башталып, сырткы фасадына оңдоо үчүн орнотулган бамбук каркастарынын кесепетинен тездик менен жайылып кеткен.
Жергиликтүү өрт өчүрүү бөлүмүнүн маалыматы боюнча, учурда 44 адам каза болгон, анын ичинде бир өрт өчүрүүчү бар.
Жаракат алгандардын 45и ооруканага жаткырылган жана абалы оор экени кабарланууда.
Өрт жалын каптаган жети имараттын үчөөсүндө көзөмөлгө алынды, ал эми болжол менен 4000 адам жашайт деп болжолдонгон комплекстин ичиндеги дагы төрт имаратта өрт уланууда.
Жалпысынан 279 адам дайынсыз жоголгону кабарланууда, ал эми 26 өрт өчүрүүчү өрттү өчүрүү аракеттерин улантууда.
Полиция оңдоо иштерин жүргүзгөн курулуш компаниясынын эки менеджерин жана бир консультант инженерди "байкабастыктан киши өлтүрүүгө" шектүү катары кармады.
Бийлик өкүлдөрү оңдоо иштери үчүн орнотулган бамбук каркастары жана терезелерди каптаган көбүктүү пластик өрттүн тез жайылышында маанилүү роль ойногонун билдиришти.
"Биз компаниядагы жооптуу адамдардын одоно шалаакылыгынан улам өрттүн тез жайылышына жана көптөгөн адамдардын өмүрүн алганына шектенебиз", - деди башкы комиссар Эйлин Чунг Лай-йе.
Адаттагыдан ылдамыраак
Гонконгдун Коопсуздук министри Крис Танг иликтөөнүн алгачкы жыйынтыктары өрттүн жайылышы адаттан тыш ылдамыраак болгонун көрсөткөнүн, негизинен көбүк изоляция материалдарына байланыштуу экенин айткан.
«Биз имараттын дубалдарын жаап турган материал, араа боосу жана суу өткөрбөгөн брезент оттун коопсуздук стандарттары талап кылган материалдарга салыштырмалуу отту алда канча тез жайылтууну күчөткөнүн аныктадык», — деп кошумчалады ал.
17 жыл ичинде биринчи жолу Гонконг шаарында беш деңгээлдүү шкаланын эң жогорку, 5-деңгээлдеги өрт эскертүүсү чыгарылды.
Бийлик билдиргендей, эки коңшу комплекс дагы эвакуацияланып, өрттөн жабыркаган болжол менен 900 тургун сегиз убактылуу жайга жайгаштырылды.
Окуя болгон жерге 140тан ашык өрт өчүрүү техникалары жана 800дөн көп куткаруу жана өрт кызматкерлери тартылды.
Транспорт департаменти өрттүн айынан айланадагы жолдор жабылганын жарыялады.
Кытайдын президенти Си Цзиньпин каза болгондор үчүн Гонконг өкмөтүнө көңүл айткан жана Бээжиндеги Гонконг жана Макао иштеринин кеңсесине жергиликтүү бийликке жардам көрсөтүүнү тапшырган.
Гонконгдун Башкы аткаруучу Джон Ли Ка-чиу каза болгондор жана жаракаттагандар көп болуп жатканына терең кайгырарын билдирип, жабыркагандардын үй-бүлөлөрүнө көңүл айтты жана жабыркагандарга тезирээк сакайууну каалады. Ал кырсыкка байланыштуу чараларды координациялоо үчүн Кабинет менен өзгөчө жыйын чакырды.
