Америка аскерлери Газадагы ок атышууну токтотууну көзөмөлдөө и үчүн Израилге кел
200 америкалык аскер келишимдин ишке ашырылышына көзөмөл жүргүзүүгө жардам берет, бирок Газага кирбейт.
Америкалык маалымат каражаттарынын билдиргенине караганда америкалык аскерлер Газа тилкесиндеги ок атышпоо келишиминин аткарылышын көзөмөлдөй турган көп улуттуу атайын топко кошулуу үчүн ишемби күнү Израилге келе баштады.
ABC News эки америкалык жетекчиге шилтеме жасап, ок атышууну токтотуу келишимин көзөмөлдөөгө жооптуу координациялык борборду түзүү үчүн 200гө жакын америкалык персоналдын дайындалганын билдирди. Бул команданын логистика, коопсуздук, транспорт, пландоо жана инженерия сыяктуу тармактарда иштей турганы белгиленди.
Маалыматта АКШ күчтөрүнүн Израилде кала турганы жана Газага кирбей турганы айтылды. Миссия АКШнын Борбордук командирлигинин (CENTCOM) башчысы адмирал Брэдли Купердин жетекчилиги астында жүргүзүлөт жана жумушчу топко катышкан региондук өлкөлөрдүн бөлүктөрү менен кызматташтыкта ишке ашырылат.
Трамптын 20 пункттан турган планы
Бул жайгаштыруу АКШнын президенти Дональд Трамптын шаршемби күнү Израиль менен ХАМАСтын 29-сентябрда сунушталган 20 пункттан турган планын ишке ашыруунун биринчи этабына макул болгонун жарыялагандан кийин башталды.
Келишимге ылайык, ХАМАС калган израилдик туткундарды бошотот, ал эми Израиль болжол менен 2000 палестиналык туткунду бошотуп, Газадан аскерлерин акырындык менен чыгара баштайт.
Экинчи этапта Газада ХАМАС катышпаган жаңы башкаруу механизми түзүлөт, биргелешкен палестиналык-мусулман коопсуздук күчү уюштурулат жана ХАМАС куралсыздандырылат.
2023-жылдын октябрынан бери Израилдин чабуулдарынан 67200гө жакын палестиналык, көбүнчө аялдар жана балдар каза болуп, Газа дээрлик жашоого жараксыз абалга келген.