Ирандын Тышкы иштер министри Аббас Аракчи ядролук сүйлөшүүлөрдү кайра баштоонун, АКШнын Тегеранга кандайдыр бир аскердик агрессиядан баш тартарына байланыштуу так кепилдигине жараша болорун билдирди.
“Мен сүйлөшүүлөр дароо башталат деп күтпөйм,” – деди Аракчи шейшемби күнү CBS News каналына берген маегинде. “Кайрадан сүйлөшүү үстөлүнө отурардан мурун, Америка бизге аскердик жактан кол салбай тургандыгына байланыштуу кепилдик бериши керек. Бардык жагдайларды эске алганда көбүрөөк убакыт талап кылынат,” – деп кошумчалады.
Бул билдирүүлөр аймакты кеңири согуштун босогосуна алып келген 12 күндүк кагылышуудан кийин жүрүп жаткан дипломатиялык аракеттердин алкагында айтылды. Дүйшөмбү күнү Ак үй АКШнын президенти Дональд Трамптын Жакынкы Чыгыш боюнча өкүлү Стив Виткофф менен Ирандын расмий өкүлдөрүнүн ортосундагы сүйлөшүүлөрдү ырастап, чыңалууну азайтууга карата жылыш бар экенин ишара кылды.
‘Улуттук сыймык жана даңк маселеси’
Аракчи Ирандын ядролук программасы боюнча чечкиндүү позициясын дагы бир жолу баса белгилеп, аны “улуттук сыймык жана даңк маселеси” деп мүнөздөдү жана Тегеран бул багыттан “оңой менен баш тартпай турганын” айтты.
Ошондой эле Ирандын акыркы жаңжал учурунда өзүн коргоого жөндөмдүү экенин далилдегенине басым жасады. "Биз бул 12 күндүк согушта эгемендүүлүгүбүздү коргой аларыбызды далилдедик" деген Аракчи "Эгер кол салуулар кайра башталса, биз чечкиндүү түрдө жооп кайтарабыз" деп кошумчалады.
Израиль менен Ирандын ортосундагы жаңжал Тель-Авив 13-июнда Ирандын аскерий, өзөктүк жана жарандык объектилерине абадан сокку урганда башталган. Ирандын Саламаттыкты сактоо министрлигинин маалыматына караганда, соккулардан кеминде 935 киши набыт болуп, 5300дөн ашуу киши жаракат алды.
Тегеран болсо жооп иретинде Израилге каршы ракеталык жана учкучсуз аппараттар менен чабуул жасаган. Кудстагы Ибрани университети тараткан маалыматка караганда, бул кол салууларда кеминде 29 киши каза болуп, 3400дөн ашуун киши жаракат алды.
АКШ да кагылышууну күчөтүп Ирандын Фордо, Натанз жана Исфахан ядролук объектилерин бомбалаган.
Кагылышуу 24-июнда АКШнын ортомчулугундагы ок атышпоо келишими күчүнө киргенден кийин токтогон.
