АКШнын президенти Дональд Трамп Украина менен Россиянын ортосунда 9-май, ишемби күнү башталып, үч күнгө созула турган ок атышууну токтотуу жарыялады. Трамп бул ок атышууну токтотуу 11-майга чейин созулуп, Россиянын Украинаны оккупациялоосун токтотуу боюнча узак мөөнөттүү келишимге алып келиши мүмкүн деген үмүтүн билдирди.
Макулдашуунун алкагында тараптардын ар бири 1000ден туткунду алмаша турган маанилүү процессти камтууда. Москва менен Киев ок атышууну токтотуу жана туткундарды алмашуу тууралуу маалыматты өз алдынча жасаган билдирүүлөрүндө ырасташты.
Буга чейин Россия 9-Май Жеңиш күнүнө карата бир тараптуу ок атпоо жарыялаган болсо, Украина тарап буга Москвадагы аскердик параддын коопсуздугун камсыздоо үчүн жасалган "пропагандалык кадам" катары баа берген.
Ок атышууну токтотуу режими күчүнө киргенге чейин кагылышуулар уланып, жума күнү эки тарап тең учкучсуз учактар менен чабуул жасашты. Украинанын маалыматы боюнча, Россия түн ичинде 67 дрон учурган. Ал эми Москва борбор шаарды бутага алган 100 дрон менен бирге жалпысынан Украинанын 400дөн ашык учкучсуз учагы зыянсыздандырылганын билдирди. Оккупациядагы Херсон облусунда Украинанын дрон чабуулунан эки жарандын каза болгону билдирилди.
Украинанын президенти Владимир Зеленский Ярославль облусундагы мунай базасына жасалган чабуулга жогору баа берди. Россиянын президенти Владимир Путин Коопсуздук кеңешинин жыйынын өткөрүп, жарандык авиация инфраструктурасына жасалган чабуулдарды “террордук актылар” деп мүнөздөдү.
Убактылуу тыныгууга карабастан, кагылышууну толугу менен токтотуу боюнча жүрүп жаткан сүйлөшүүлөрдө азырынча олуттуу жылыш байкала элек.
