АКШнын президенти Дональд Трамп Иран менен сүйлөшүүлөр эми телефон аркылуу жүргүзүлүп жатканын маалымдады.
Трамп шаршемби күнү Ак үйдө журналисттерге: "Биз азыр алар менен сүйлөшүп жатабыз жана ар бир жолу документти көрүү үчүн 18 саат учурбайбыз. Биз муну телефон аркылуу чечип жатабыз", - деди.
Иран менен АКШ 11-апрелде Пакистандын борбору Исламабадда сүйлөшүүлөрдү өткөрүштү, бирок 28-февралда башталган согушту токтотуу боюнча макулдашууга жетише алышкан жок.
Сүйлөшүүлөр 8-апрелде Пакистан ортомчулук кылган жана кийинчерээк Трамп тарабынан узартылган эки жумалык ок атышууну токтотуудан кийин болду. Трамп ушул дем алыш күндөрү өзүнүн атайын өкүлү Стив Виткофф менен Жаред Кушнердин Исламабадга пландаштырылган сапарын жокко чыгарды.
Трамп адатта бетме-бет жолугушууларды артык көрөрүн мойнуна алып, мындай деди: "Мен ар дайым бетме-бет жолугушууну жактырам, билесиздер менимче бул жакшыраак. Бирок эгер жолугушуу өткөргүңүз келгенде ар бир жолу 18 саат учууга аргасыз болсоңуз жана сүйлөшүү эмне жөнүндө экенин билсеңиз... бул акылга сыйгыс".
Ошондой эле Трамп кандайдыр бир келишим Ирандын өзөктүк курал боюнча амбицияларынан толугу менен баш тартуусуна байланыштуу болорун да кайталады.
