Индиянын премьер-министри Нарендра Моди шаршемби күнү Израилге эки күндүк сапар менен барды.Бул сапар аймакта АКШ менен Ирандын ортосундагы аскердик кагылышуу коркунучу күчөп жаткан маалда, эки өлкөнүн карым - катнаштарын тереңдетүү мүмкүнчүлүгү катары каралууда.
Индус улутчулдугу менен таанылган Моди 2017-жылы Израилге барган Индия тарыхындагы алгачкы премьер-министр болгон; ал сапарында Нетаньяху менен бирге түндүктөгү порт шаары Хайфанын жээгинде жылаңайлак басып жүрдү.
Дээрлик тогуз жылдан кийин, азыр да кызматта турган эки лидер бири-бирин дос катары сыпатташат жана Израилдин аскердик экспортун көбөйтүүгө аракет кылып жаткан учурда жасалма интеллект менен коргонуу маселелерин талкуулашаары күтүлүүдө.
Израиль өкмөтүнүн бир өкүлү сапардын "көптөгөн тармактарда жаңы өнөктөштүккө жана кызматташууга жол ачат" деп билдирсе Израилдин тышкы иштер министрлигинин өкүлү эки тараптуу карым - катнаштардын олуттуу өнүгүү алдында турганын айтты.
Модинин Израиль парламенти Кнессетте сөз сүйлөп, Израилдин расмий Холокост эстелиги болгон Яд Вашемге гүлчамбар коюшу күтүлүүдө.
АКШнын аскердик жайгаштыруусу
Модинин сапары АКШнын Иранга жакын жерде чоң аскер-деңиз күчтөрүн жайгаштырып жаткан жана Тегерандын өзөктүк программасы боюнча эки өлкөнүн ортосундагы сүйлөшүүлөр токтоп калган учурга туш келди. Пентагон ошондой эле Израилдин жээктерин көздөй багыт алган учак ташуучу кемесин Жер ортолук деңизине жөнөттү.
АКШнын Иранга жасаган чабуулу Ирандын Израилге жана Перс булуңундагы араб өлкөлөрүндөгү АКШнын аскердик объектилерине жооп кайтаруусуна алып келиши мүмкүн; бул өлкөлөрдө миллиондогон индиялыктар жашайт, иштейт жана жыл сайын миллиарддаган доллар которушат.
Индияда жайгашкан «Observer Research Foundation» аналитикалык борборунун эксперти Кабир Танежа Нью-Делинин аймакта кагылышууну каалабай турганын белгилеп: «Мындай билдирүүлөр мурда да айтылган жана бул сапар учурунда да айтыларына ишенем», — деди.
Израилдин Тышкы иштер министрлигинин өкүлү сапардын алкагында «аймактык масштабдагы» сүйлөшүүлөрдүн болушу мүмкүн экенин билдирди.
Ушул аптада министрлер кабинетинин жыйынында сөз сүйлөгөн Нетаньяху Индияны келечектеги пикирлеш өлкөлөрдүн альянсынын бир бөлүгү катары сыпаттады. «Биздин кызматташтыгыбыз чоң натыйжаларды бериши мүмкүн жана албетте, биздин туруктуулугубузду жана келечегибизди камсыз кылат», — деп кошумчалады.
Танежа Индиянын Израилде жасалган аскердик техникаларды сатып алууга кызыкдар экенин, бирок Нью-Дели эл аралык мамилелердеги бейтараптуулук салтынан улам кандайдыр бир расмий альянска кирүүгө этияттык менен мамиле кыларын белгиледи.
