АКШнын Мамлекеттик департаменти Украинанын коопсуздугун чыңдоого багытталган 2,1 миллиард долларлык курал-жарак сатуунун мүмкүн болгон келишимин жактырды. Бул келишим АКШнын тышкы саясат жана улуттук коопсуздук максаттарына да салым кошору белгиленди.
Билдирүүдө келишимдин алкагында Украинага PAC-3 үлгүсүндөгү 500 ракета жана тиешелүү жабдууларды жеткирүү пландалып жатканы айтылды. Ошондой эле куралдардын баасы толугу менен өнөктөштөр жана союздаштар тарабынан каржыланары белгиленди.
Билдирүүдө: «Украина бул сатып алууну JUMPSTART программасы аркылуу Канададан, Германиядан жана Норвегиядан берилген каражаттардын, ошондой эле Европа Биримдигинин Украинага колдоо көрсөтүү насыясынын эсебинен каржыланган улуттук фонддордун эсебинен төлөйт», — деп айтылды.
АКШнын каражаттары колдонулбай турганы баса белгиленген билдирүүдө америкалык Lockheed Martin коргонуу компаниясы келишимдин башкы аткаруучусу болору маалымдалды.
