Вашингтон Иран менен согушка көңүл буруп жаткандыктан, АКШ жетектеген Экинчи Дүйнөлүк cогуштан берки Европадагы эң кандуу жаңжалды токтотуу боюнча дипломатиялык аракеттер акыркы айларда токтоп калды.
Орус жана Украинанын сүйлөшүүчүлөрү акыркы жолу февраль айында Женевада АКШнын ортомчулугу менен сүйлөшүүлөр үчүн жолугушкан, бирок аймак маселеси боюнча макулдашууга жетише алышкан эмес. Ошондон бери сүйлөшүүлөр кайра жандана элек.
Кремлдин басма сөз катчысы Дмитрий Песков журналисттерге Орусия «үч тараптуу форматты кайра баштоо мүмкүнчүлүгүн жокко чыгарбаганын, бирок сүйлөшүүлөрдүн орду же так датасы жөнүндө бир нерсе айтууга али эрте экенин» айтты.
Виткофф менен Кушнер дем алыш күндөрү жаңжалды токтотуу боюнча жаңы аракеттин алкагында Орусиянын президенти Владимир Путин жана Украинанын президенти Владимир Зеленский менен жолугушту.
Украина президентинин аппаратындагы жогорку даражалуу булак AFP агенттигине эки тарап согушту токтотуу боюнча «натыйжалуураак» сунуштарды сунуштаганын айтты; бирок Москва да, Киев да жетишкендиктерди жарыялаган жок.
Төрт жарым жылдык жаңжал он миңдеген жоокерлердин жана жайкын тургундардын өмүрүн алды.
Орусия толук көзөмөлдөбөгөн, бирок тынчтык келишиминин бир бөлүгү катары талап кылган Донбасс аймагынын маселесинен улам сүйлөшүү процесси токтоп калууда.
