Орусиянын тышкы иштер министри Сергей Лавров менен АКШнын мамлекеттик катчысы Марко Рубио Украинадагы жаңжалды жөнгө салуу мүмкүнчүлүктөрүн жана дүйшөмбү күнү Түркияда өткөрүлүшү пландалган Орусия-Украина сүйлөшүүлөрүн талкуулашты.
Министрлик жекшемби күнү өзүнүн сайтында жарыяланган билдирүүдө «Украина кризисине байланыштуу кырдаал талкууланганын» билдирди.
Билдирүүгө ылайык, С.В.Лавров менен М.Рубио Украина кризисин чечүү боюнча түрдүү демилгелер, анын ичинде 2-июнда Стамбулда Орусия-Украина түз сүйлөшүүлөрүн кайра баштоо пландары боюнча пикир алмашышты.
АКШнын Мамлекеттик департаменти жолугушуунун Орусиянын талабы менен болгонун белгилеп, Рубио АКШнын президенти Дональд Трамптын Орусия менен Украинанын ортосундагы түз сүйлөшүүлөрдү улантуу чакырыгын кайталап, мунун «узак тынчтыкка» жетишүү үчүн зарыл экенин баса белгиледи.
Ал арада орус маалымат агенттиктеринин кабарлашынча, Украина өзү даярдаган тынчтык келишиминин долбоорун Орусияга жөнөттү. Бул тууралуу ТАСС Кремлдин кеңешчиси Владимир Мединский: «Орусиялык делегация Украинадан тынчтык жолу менен чечүү боюнча меморандумдун долбоорун алды»,-деп айтканын билдирди. Мединский дүйшөмбүдө Украина менен тынчтык сүйлөшүүлөрүнө катышкан Москва делегациясын жетектейт.
Көпүрө окуясы
Министрлик ошондой эле жолугушууда Рубио Украина чек арасындагы Орусиянын эки аймагындагы көпүрөлөрдүн жарылышынын натыйжасында каза болгондор үчүн көңүл айтканын белгиледи.
«Орус тарап компетенттүү органдар ар тараптуу иликтөө жүргүзүп, анын жыйынтыгы чыгарылаарын баса белгиледи. Күнөөлүүлөр аныкталып, алар татыктуу жазасын аларынан шек жок», - деди Рубио.
Орус бийликтери ишемби күнү эки көпүрөнүн жарылуусунан кеминде жети киши каза таап, 69у жарадар болгонун жарыялады.
Кол салуулар Украина тарабынан жасалды
Эки аткаминердин жолугушуусу Украина Орусиянын аба базаларына болуп көрбөгөндөй чабуул жасагандан кийин болду.
Украинанын өкмөт өкүлү Рейтер агенттигине Орусиянын аба базаларына учкучсуз учуучу аппаратардын чабуулдары тууралуу АКШга алдын ала кабарлаган эмес деп билдирди.
Ошол эле учурда Украинанын ички чалгындоо агенттиги SBU төрт базага жасалган чабуулдар үчүн жоопкерчиликти өзүнө алды. Украинанын коопсуздук кызматкери жалпысынан орусиялык 41 согуштук учак атылганын билдирди.
Орусиянын Коргоо министрлиги базалардагы учактар эки аймакта күйгөнүн, бирок өрт өчүрүлгөнүн билдирди.
