Россия Украинанын чыгышындагы Покровск шаарын жана түндүк-чыгышындагы Вовчанск шаарын басып алганын жарыялады. Дүйшөмбү күнү Кремль тарабынан Telegram аркылуу жарыяланган бул дооматтар согушту токтотуу боюнча АКШ жетектеген сүйлөшүүлөрдө Вашингтондун колдоосун алууга аракет кылып жаткан Киевге карата кысымды күчөттү.
Орус маалымат агенттиктеринин билдиргенине караганда президент Владимир Путин Украинадагы чабуулдук операциянын маанилүү чекити болгон Покровскту басып алуу аскерлерге өз максаттарына жетүүгө мүмкүндүк берерин айтты.
Путин командалык пунктка барганда: "Бул абдан маанилүү тилке. Анын канчалык маанилүү экенин баарыбыз билебиз. Бул өнүгүү атайын аскердик операциянын башында койгон максаттарыбыздын кийинки этаптарда ишке ашырылышын камсыздайт",- деди.
Путин өзгөчө: "Орус куралдуу күчтөрү демилгени ишенимдүү түрдө кармап, операциянын максаттарына жетүүнү улантууда. Орус аскерлери дээрлик бардык багыттар боюнча алдыга жылып жатышат", - деди.
Россиянын лидери Украинанын орус армиясынын алдыга жылышына жооп кайтара албай жатканын, айрыкча Запорожье аймагынын түштүгүндөгү жетишкендиктерди баса белгиледи.
Путин согушта оор жоготууларга учураган украин аскерлеринин абалын "украин эли үчүн трагедия" деп мүнөздөдү.
Кремлдин жекшемби күнү жасаган билдирүүсүндө Россиянын башкы штабынын төрагасы Валерий Герасимовдун Путинге орус тилинде Красноармейск жана Вовчанск деп аталган шаарлардын бошотулганын билдиргенин жарыялады; Красноармейск - Покровсктун орусча аталышы.
Россиянын Коргоо министрлиги орус аскерлеринин Покровсктун борбордук аянтында мамлекеттик желекти көтөрүп жатканын көрсөткөн видеону жарыялады.
«Маанилүү кадам»
Донецк облусундагы согушка чейинки калкынын саны болжол менен 60 000ди түзгөн жол жана темир жол түйүнү болгон Покровск акыркы айларда орус кол салууларынын бутасы болду.
Украина өткөн айда шаарга атайын күчтөр менен бирге кошумча аскерлерди жөнөткөн, бирок жүздөгөн орус аскеринин шаарга киришине тоскоол боло алган эмес.
Харьков облусундагы Вовчанск 2024-жылдын май айынан бери катуу салгылашуулардан улам талкаланган.
Россиянын коргоо министри Андрей Белоусов Вовчансктын алынышын "жеңишке карай маанилүү кадам" деп мүнөздөдү.
