Пакистан менен Афганистандын ортосундагы сүйлөшүүлөрдүн экинчи айлампасы Стамбулда өтөт. Пакистандын Тышкы иштер министрлиги менен Афганистандын расмий өкүлдөрү жыйындын ишемби күнү өтөөрүн жарыялашты.
Пакистандын Тышкы иштер министрлигинин басма сөз катчысы Тахир Хүссейин Андраби Исламабадда журналисттерге берген маалыматында жолугушуунун "чек ара терроризмин алдын алуу үчүн конкреттүү жана текшерилүүчү мониторинг механизмин түзүү" экенин айтты.
"Пакистан менен Афганистандын ортосунда 2025-жылдын 19-октябрында Катардын Доха шаарында жетишилген келишимди аймактык тынчтыкка жана туруктуулукка жетүү жолундагы биринчи кадам катары ыраазычылык менен кабыл алабыз", - деди Андраби.
"Пакистан Афганистандын аймагынан Пакистанга багытталган террордук коркунучту карап чыгуу жана пакистандыктардын өмүрүн сактап калуу максатында Түркиянын 2025-жылдын 25-октябрында Стамбулда өткөрө турган кийинки жыйында конкреттүү жана текшерилүүчү мониторинг механизмин түзүүнү күтөт", - деди.
Кабул башкаруусу да Стамбулдагы жыйынды тастыктады.
Афганистандын убактылуу өкмөтүнүн өкүлү Забихулла Мужахид делегацияны Ички иштер министрлигинин орун басары Маулви Рахматулла Наджибдин жетектеп жатканын билдирди. X платформасынан:"Пакистан менен калган маселелер жыйында талкууланат", – деген Мужахид афган делегациясынын Кабулдан Стамбулга карай жолго чыкканын да билдирди.
Чек арадагы бир нече күндүк кандуу кагылышуулардан кийин, өткөн аптада Дохада Катар жана Түркиянын ортомчулугу менен Исламабад менен Кабулдун ортосунда сүйлөшүүлөр өтүп, учурда күчүндө турган ок атышпоо келишимине жетишилген.
Пакистандын Тышкы иштер министрлигинин өкүлү Андраби Катар жана Түркиянын эки тараптын диалогун жеңилдетүүдөгү "конструктивдүү ролуна" жогору баа бергенин билдирди.
