News18 агенттигинин маалыматына ылайык, бейшемби күнү Индиянын батышында кырсыкка учураган Air India авиакомпаниясына таандык учактагы 242 жүргүнчүнүн баары каза болду. Учак Ахмедабаддагы Сардар Валлабхай Пател эл аралык аэропортунан учуп чыккандан көп узабай медициналык окуу жайдын жатаканасына кулап түштү. Ахмедабад полициясы, кырсыктан жатаканадагы кеминде беш студент каза таап, 25 кишинин жаракат алганын билдирди.
Индиянын Жарандык авиация башкы директорлугунун маалыматына караганда, Air India авиакомпаниясынын AI171 рейс учагы Гужарат штатынын Ахмедабад шаарындагы Меганинагар аймагына 232 жүргүнчү жана 10 экипаж мүчөсү менен кулап түштү.
Air India авиакомпаниясы кырсыкта каза болгондордун 169у Индиянын жараны, 53ү британиялык, 7си португалиялык, 1нин канадалык экенин жана учакта эки учкуч жана 10 экипаж мүчөсү болгонун билдирди. Кырсыктан каза тапкандардын арасында Гужараттын мурдагы премьер-министри Вижай Рупани да бар.
Бейшемби күнкү кырсыктан кийин Ахмедабаддагы ооруканаларга 100дөн ашуун адамдын сөөгү жеткирилгенин жергиликтүү полиция ырастады.
Окуяга күбө болгондор аэропорттун жанында катуу жарылуунун үнү угулганын, андан кийин учактын ылдам түрдө ылдыйлаганын билдиришкен. Гужарат өкмөтү жабыркагандарга колдоо көрсөтүүнү убада кылды.
Индиянын премьер-министри Нарендра Моди X социалдык медиа платформасында кырсыкка катуу капа болгонун айтып: "Ахмедабаддагы трагедия баарыбызды терең кайгыга салды. Бул окуядан таасирленгендердин жанындамын. Тиешелүү министрлер жана расмий өкүлдөр менен байланыштамын" деди.
