Абакта жаткан мурдагы грузин президенти Михаил Саакашвили Украина президенти Владимир Зеленскийден өзүн алмашуу тизмесине “жарандык согуш туткуну“ катары киргизүүнү өтүндү.
Клиникадан Грузиядагы түрмөгө которулгандан кийин Саакашвили бейшемби күнү жарыялаган Facebook кайрылуусунда Украинанын жараны, Одесса облустук мамлекеттик администрациясынын мурдагы башчысы жана Украинанын Улуттук реформа кеңешинин төрагасы экенин баса белгиледи.
Грузиянын орусиячыл режими тарабынан «мыйзамсыз кармалгандыгы» үчүн Зеленскийден өзүн ушул статус менен таанууну өтүндү.
Бул кайрылуу Грузиянын Өзгөчө абак кызматы аны Рустави абагына кайтарганын жана ден-соолугу «канааттандырарлык» экенин билдиргенден кийин болду.
Саакашвили буга каршы чыгып, 2022-жылдын мартында аны ууландырган деп ырасталган ошол эле түрмө кызматкерлеринин көзөмөлүнө кайрадан өткөрүп берилип жатканын айтты.
Саакашвили 2013-жылы Грузиядан чыгып кеткен. Ал "саясий максаттуу" деп мүнөздөгөн айыптар боюнча соттолгон.
Андан соң 2021-жылдын октябрь айында Грузияга кайтып келгенде дароо камакка алынган. Жаза мөөнөтүн өтөп жатканда ден-соолугу кескин начарлап, 2022-жылдын май айында дарылануусу үчүн Тбилисидеги клиниканын бирине которулган.
Саакашвилинин 2034-жылга чейин камакта калары күтүлүүдө.
Ал бийликти кыянаттык менен пайдалануу жана мыйзамсыз чек арадан өтүү сыяктуу айыптар боюнча соттолуп, өзүнө коюлган айыптарды саясий максаттуу деп айтып келет.
Мыйзамсыз чек арадан өтүү боюнча иликтөө 2021-жылдын 1-октябрында башталган: Саакашвили 2021-жылдагы жергиликтүү шайлоолордун алдында, 28-сентябрдан 29-сентябрга караган түнү Украинадан Грузияга жашыруун кайтып келгенден кийин кармалган.
