Канаданын премьер-министри Марк Карни АКШнын президенти Дональд Трамп менен критикалык сүйлөшүүлөрдү өткөрүү үчүн АКШга барды. Бул сапар Трамптын Канадага каршы соода согушу жана аннексия коркутуусу уланып жаткан маалга туш келүүдө.
Ак үйдөгү бул жолугушуу, Карни Либералдар партиясын төртүнчү жолу шайлоодо жеңишке жеткиргенден бир жума өткөндөн кийин болуп жатат.
Карни шейшемби күнү Ак үйдө Трамп менен жолугушат. 28-мартта Трамп менен Карнинин биринчи телефондук сүйлөшүүсүнөн кийин Трамп Truth Social платформасында Канададагы шайлоодон кийин дароо жолугушуп, саясат, бизнес жана башка тармактар боюнча иш алып барарын жарыялаган.
Тынчсыздануу күчөп жатат
Трамп буга чейин Канададан импорттолуучу товарлардын көбүнө 25 пайыздык жана Канаданын энергетикалык өнүмдөрүнө 10 пайыздык бажы алымдарын киргизген болчу. АКШ президенти жыгач, сүт азыктары, ошондой эле потенциалдуу болот менен алюминийге көбүрөөк кошумча тарифтерди киргизерин билдирип, Канаданы "51-штат" деп сыпаттаган. Бул эки өлкөнүн ортосундагы чыңалууну күчөткөн.
Канада жооп катары АКШнын унааларына жана тетиктерине 25 пайыздык тариф киргизген. Премьер-министр Марк Карни соода сүйлөшүүлөрүн Канаданын шарттары менен жүргүзүүнү жана дүйнөлүк өнөктөштүктөрдү тереңдетүүнү убада кылган.
Онтарионун жооп иретинде электр энергиясына кошумча салыкты токтотушу Трампты металлдарга жогорку тарифтерди убактылуу кийинкиге калтырууга түрттү, бирок АКШ менен Канаданын ортосундагы соода чыңалуусу уланууда.
