АКШ президенти Дональд Трамп өзүнүн атайын өкүлү Стив Виткофф шаршемби күнү Орусиянын расмий өкүлдөрү менен жолугушарын билдирди. Ак Үй Москва менен Украинанын согушуна байланыштуу кошумча санкцияларды карап жатат.
“Биз эртең Орусия менен жолугушабыз. Эмне болорун көрөбүз”, – деди Трамп шейшемби күнү журналисттерге.
Ал АКШнын Орусиянын энергиясын сатып алган өлкөлөргө, анын ичинде Кытайга, 100 пайыздык тарифтерди киргизүү ниети бар-жогун тактаган жок.
“Мен эч качан пайыздык көрсөткүч айткан эмесмин, бирок биз бул боюнча бир топ иштерди жасайбыз. Кыска убакыттын ичинде эмне болорун көрөбүз”, – деди ал.
Трамп кошумчалагандай, АКШ жаңы санкциялар боюнча чечимди шаршемби күнкү сүйлөшүүлөрдөн кийин кабыл алат.
Бул билдирүүлөр президент тарабынан Орусияга Украинанын согушун токтотуу боюнча келишимге жетүү үчүн 8-августка чейин убакыт берилгенден кийин айтылды. Эгерде келишимге жетишилбесе, АКШ басымды күчөтөт.
Шейшемби күнү эртең менен Мамлекеттик департаменттин өкүлү Тэмми Брюс Виткоффтун Москвага сапары боолоорун тастыктады.
“Биз бул маалыматты бул трибунадан тастыктай алабыз. Бирок сапар эмнени камтый турганы тууралуу азырынча маалыматым жок”, – деди Брюс.
Ал кошумчалагандай, Трамп Орусиянын президенти Владимир Путиндин жана Москванын аракеттерине “ыраазы эмес”, бирок согушту токтотуу үчүн дипломатиялык чечимдерге берилген бойдон калууда.
Ак Үй Орусиянын энергиясын импорттоону уланткан өлкөлөргө эскертүүлөрдү күчөттү. Мындай сатып алуулар Кремлдин согуштук аракеттерин колдогон негизги булак катары мүнөздөлүүдө.
