Түрк тышкы иштер министрлиги эл аралык сууларда бара жаткан Глобалдык Сумуд флотилиясынын кемелеринде Израиль күчтөрү тарабынан камакка алынган 36 түрк жаранынын бүгүн атайын учак менен Түркияга кайтышы күтүп жатканын билдирди.

Тышкы иштер министрлигинин басма сөз катчысы ишемби күнү X социалдык тармагында жасаган билдирүүсүндө: "Так сан азырынча белгисиз. Калган жарандарыбыздын дагы кыска убакыттын ичинде Түркияга келиши үчүн иш-аракеттерди аяктоо боюнча иштерибиз уланууда", - деди. Ошондой эле пландалган каттамда үчүнчү өлкөнүн жарандары да болору белгиленди.

470тен ашуун активист кармалды

Эл аралык жарандык коом уюмдарынан турган Эркиндик Флотилия Коалициясы 2010-жылдан бери Газа блокадасын бузуу жана гуманитардык кризиске көңүл буруу үчүн көптөгөн демилгелерди көтөрдү.

Израилдин деңиз флоту бейшемби күнү Глобалдык Сумуд флотилиясына чабуул жасап, кемелерди басып алып, 50дөн ашуун өлкөдөн 470тен ашуун активистти камакка алды. Флотилиянын максаты Газага гуманитардык жардам жеткирүү жана Израилдин блокадасын бузуу болгон.

Израиль дээрлик 18 жылдан бери 2 миллион 400 миң киши жашаган Газаны блокадага алууда. 2023-жылдын октябрынан бери Израилдин бомбалоолору көбү аялдар менен балдардан турган болжол менен 66 300 палестиналыктын өмүрүн алып, аймакты жашоого жараксыз абалга алып келди жана блокада Газаны ачарчылыкка алып келди.