Орусиянын Коргоо министрлиги Украинадагы логистикалык борборлорго, кампаларга жана портторго чабуул жасалганын, украин армиясынын муктаждыктары үчүн колдонулган кемелерге да пилотсуз учуучу аппараттар менен сокку урулганын жарыялады. 

Министрликтин билдирүүсүндө түн ичинде Украинанын Киев жана Одесса облустарындагы ар кандай буталарга чабуул коюлганы кабарланды. 

Киев облусунун Щастливое шаарындагы "BDU Logistic" борборуна сокку урулганы жана анын кампаларында аскердик максаттагы техникалар сакталганы маалымдалды. 

Билдирүүдө ошондой эле Бояркадагы украин аскердик өнөр жай объектилерин камсыз кылган газ бөлүштүрүүчү станция бутага алынганы айтылды. 

Одесса облусунда болсо Одесса портуна украин армиясы үчүн жүк ташыган кемеге сокку урулганы кабарланды. 

Ал эми Измаил портунда аскердик жүктөрдү түшүрүү жана сактоо үчүн колдонулган порт инфраструктурасы бутага алынганы, Одесса портуна Украина армиясы үчүн жүк ташып бараткан дагы бир кеме да жолдо соккуга кабылганы билдирилди. 

Андан тышкары, министрлик түн ичинде Орусиянын аймагына жөнөтүлгөн 244 украиналык пилотсуз учуучу аппараттын жок кылынганын жарыялады.