Египеттин тышкы иштер министри Бадр Абдулати шейшемби күнү Газа тилкесинде ок атышууну токтотуу боюнча сүйлөшүүлөрдүн алкагында Израилдин толук чыгып кетиши жана гуманитардык жардамга толук жетүүсү үчүн механизм түзүү боюнча сүйлөшүүлөрдүн уланып жатканын билдирди.
Абдулати словениялык кесиптеши менен өткөргөн пресс-конференцияда «олуттуу прогресске жетишилгенин» белгилеп, азыркы сүйлөшүүлөрдүн натыйжасында Газадагы согуш жана ачарчылык токтойт деген үмүтүн билдирди.
Израиль менен ХАМАСтын ортосундагы кыйыр сүйлөшүүлөр дүйшөмбү күнү Египеттин Шарм-эль-Шейх шаарында Кызыл деңиздин жээгинде АКШнын президенти Дональд Трамптын ок атышпоо планын талкуулоо үчүн башталды.
Египеттин тышкы иштер министри Шарм-эл-Шейхтеги сүйлөшүүлөрдө Израилдин Газадан толук чыгып кетишин жана БУУнун каналдары аркылуу аймакка гуманитардык жардамдын шартсыз жетүүсүн кепилдөөчү механизмди түзүү маселесинин талкууланганын билдирди.
Абдулати сүйлөшүүлөрдүн максаты эки мамлекеттүү чечимге негизделген адилеттүү тынчтык жолун бекемдөө жана басып алынган Батыш Шериа менен Газанын ортосунда толук биримдикке жетишүү экенин баса белгиледи.
Жогорку мартабалуу дипломат Трамптын демилгесин ыраазычылык менен колдоду жана азыркы ылдамдыкка таянуу менен 1967-жылдагы чек араларда борбор шаары Чыгыш Кудс болгон көз карандысыз Палестина мамлекетин түзүүгө алып келе турган саясий процессти баштоого чакырды.
29-сентябрда Трамп бардык израилдик туткундарды палестиналыктарга алмаштыруу, ок атышпоо, ХАМАСты куралсыздандыруу жана Газаны кайра курууну камтыган 20 пункттан турган сунушун сунуштады. ХАМАС бул планга принципиалдуу түрдө макулдугун берди.
Египеттин мамлекеттик Al-Kahera News агенттигинин билдиргенине караганда, сүйлөшүүлөрдүн биринчи күнү позитивдүү маанайда аяктады.
Израилдин коомдук телеканалы KAN, Израилде да, АКШда да "оптимизмдин" бар экенин жанажекшемби күнгө чейин келишимдин түзүлүшү мүмкүн экенин билдирди.
