Кытайлык астронавттардын тобу космос кемеси кичинекей сыныкка урунгандан кийин Жерге кайтууну кечиктирүүгө аргасыз болушту.

Мамлекеттик телеканал CCTV билдиргендей, алардын кайтуусу башында шаршембиге пландалган болсо да, азыр белгисиз мөөнөткө жылдырылды. Бирок мындан башка маалымат берилген жок.

"Шэньчжоу-20" миссиясынын алкагында апрель айында Тяньгун космос станциясына барган үч астронавт, алты айлык миссиясынын аягына жакындап калган. Экипаждын курамында топтун жетекчиси Чэнь Дун, учкуч Чэнь Чжунжуй жана инженер Ван Цзе бар.

Шэньчжоу-21 миссиясын бул үч астронавттан өткөрүп ала турган экипаж ишемби күнү космос станциясына ийгиликтүү туташты.