Тель-Авив университетинин изилдөөсүндө Израилдин Газадагы геноциддик согушунун таасири, сот реформалары жана коомдук нааразычылык акциялары баш болгон 2023-жылдан кийинки жагдайларга басым жасалып акыркы 15 жылдагы көчүү тенденциялары иликтенди.
Изилдөөнүн жыйынтыктарына ылайык, 2023 жана 2024-жылдары Израилден болжол менен 950 дарыгер кеткен; кайтып келгендерди да эске алганда бул сан 510го жетет деп болжолдонууда.
Өлкөдөн кеткен дарыгерлердин үчтөн экиси Израилдин медициналык окуу жайларынын бүтүрүүчүлөрү болгон жана бул көрсөткүч мурунку жылдарга караганда жогору.
Изилдөөдө Израилдин Борбордук статистика бюросу, Жогорку билим берүү кеңеши, Саламаттыкты сактоо министрлиги жана Салык органынын маалыматтарынын негизинде миграция, билим берүү, лицензиялоо жана киреше тенденциялары талданат.
Кайтып келүүлөрдүн акырындашы
Изилдөөгө караганда, 2023- 2024-жылдары болжол менен 100 000 израилдик өлкөдөн чыгып кетти, бул жылына болжол менен 50 000 адамга барабар жана көп жылдык салыштырмалуу туруктуулуктан кийинки өзгөрүүнү билдирет.
Изилдөөчүлөр: "Биз өлкөдөн чыгып жаткан дарыгерлердин, PhD ээлеринин жана башка окумуштуулардын, инженерлердин жана жогорку кирешелүү адамдардын арасында олуттуу жана тынчсыздандыруучу өсүштү байкадык", - деп билдиришип, кайтып келүүлөрдүн басаңдашы адам капиталынын сыртка агылышын күчөтүп жатканына көңүл бурушту.
Жыйынтыктар кетип жаткан дарыгерлердин көпчүлүгү тажрыйбалуу адистер экенин көрсөтүп турат.
Изилдөөдө эгер бул өсүш улана берсе, анын олуттуу экономикалык кесепеттери болушу мүмкүн экени эскертилди.
Изилдөөчүлөр бул тенденция өлкө үчүн "өтө олуттуу коркунуч" жаратаарын эскертип, "Саясий, экономикалык же коопсуздукка байланыштуу кошумча соккулар миграциянын масштабынын кескин өсүшүнө алып келиши мүмкүн" деп айтышты.
