Индияда бейшемби күнү Лондонго багыт алган Boeing 787-8 Dreamliner учагы кулап түштү. Полиция учактагы 242 адамдын баары каза болгонун жана "тирүү калгандар жок" экенин билдирди.
2001-жылдын 11-сентябрындагы кол салууларды эсепке албаганда, 21-кылымдагы эң коркунучтуу авиакырсыктардын тизмеси:
298 өлүм, Украина
2014-жылдын 17-июлунда Malaysia Airlines авиакомпаниясынын MH17 каттам учагы Амстердамдан Куала-Лумпурга бара жатып, Украинанын чыгышындагы козголоңчулар көзөмөлдөгөн аймакта атып түшүрүлгөн. Boeing 777 учагындагы 298 адамдын баары, анын ичинде 193 нидерландиялык жаран каза тапкан. Быйыл май айында БУУнун Авиация агенттиги (ICAO) учактын атып түшүрүлүшүнө Орусияны күнөөлөдү, бирок Москва бул чечимди "бир тараптуу" деп четке какты.
275 өлүм, Иран
2003-жылдын 19-февралында Ирандын Революциялык гвардия корпусуна таандык орусиялык Ильюшин Ил-76 учагы өлкөнүн түштүк-чыгышындагы Керман шаарынын жанында кырсыкка учураган. Борттогу 275 адамдын баары каза тапкан. Учак учуп чыкканынан бир саат өтпөй аба ырайынын начардыгынан улам Керман аэропортуна конууга уруксат сурагандан кийин радардан жоголгон.
265 өлүм, Нью-Йорк, АКШ
2001-жылдын 12-ноябрында American Airlines авиакомпаниясынын Airbus A300 учагы Нью-Йорктун Куинс районунда учуп чыккандан көп өтпөй кырсыкка учурап, борттогу 260 адам жана жерде турган беш адам каза тапкан. Учак Нью-Йорктогу Жон Ф. Кеннеди аэропортунан Доминикан Республикасынын Санто-Доминго шаарына багыт алган эле.
257 өлүм, Алжир
2018-жылдын 11-апрелинде Ильюшин Ил-76 оор жүк ташуучу учагы Алжирдин борборунун түштүгүндөгү аскердик базадан учуп чыккандан көп өтпөй кырсыкка учурап, борттогу 257 адамдын баары каза тапкан. Жүргүнчүлөрдүн көбү аскер кызматкерлери жана алардын үй-бүлө мүчөлөрү болгон.
Деңизге кулап түшкөндөр
Булардан кийин үч эң чоң авиациялык кырсык деңизде болду.
2014-жылдын 8-мартында Malaysia Airlines авиакомпаниясынын MH370 каттам учагы Куала-Лумпурдан Бээжинге бара жатып, 239 жүргүнчү менен дайынсыз жоголгон. Түштүк Индия океанында жүргүзүлгөн кеңири издөө иштерине карабастан Boeing 777-200 учагы табылган эмес.
Экинчи окуя 2009-жылдын 1-июнунда болгон. Air France авиакомпаниясынын Airbus A330 учагы Рио-де-Жанейродон Парижге учуп бара жатып, Атлантика океанындагы турбуленттүүлүк зонасында жоголгон. Борттогу 228 жүргүнчү жана экипаж мүчөлөрү каза тапкан. Учактын калдыктары эки жылдан кийин табылган.
Үчүнчү окуя болсо 2002-жылдын 25-майында болгон. China Airlines авиакомпаниясынын Boeing 747-200 учагы Тайвань кысыгына кулап, борттогу 225 адамдын баары каза тапкан. Учак Тайпейден Гонконгго багыт алган жана учуп чыккандан 20 мүнөт өткөндөн кийин абада жарылып кеткен.
