Косовонун премьер-министри Альбин Курти Косово мамлекетинин түзүлүүсүнүн бардык этаптарында, анын өнүгүшүндө, дипломатиялык жана аскердик мүмкүнчүлүктөрүн чыңдоодо жана НАТОго мүчө болуу процессинде Түркиянын көрсөткөн колдоосунан улам президент Режеп Таййип Эрдоганга ыраазычылык билдирди.
Премьер-министр Альбин Курти Бириккен Улуттар Уюмунун (БУУ) 81-Башкы Ассамблеясынын алкагында Нью-Йоркто президент Эрдоган менен өткөргөн жолугушуусу тууралуу социалдык медиа баракчасында пост жарыялады.
Альбин Курти Косово мамлекетинин түзүлүүсүнүн бардык этаптарында, өлкөнүн өнүгүшүндө, дипломатия тармагында, аскердик мүмкүнчүлүктөрүн чыңдоодо, коргоо өнөр жайынын пайдубалын түптөөдө жана өлкөсүнүн НАТОго мүчө болуу процессинде Түркиянын көрсөткөн колдоосу үчүн президент Эрдоганга рахмат айтты.
Түркиянын НАТОнун Косово тынчтык күчтөрүндөгү (KFOR) көп жылдык ролу жана Косовонун коопсуздугу менен туруктуулугуна кошкон олуттуу салымы үчүн да Эрдоганга ыраазычылык билдирген Курти KFORдун эки мөөнөт командири болуп иштеген генерал-майор Өзкан Улуташтын кесипкөйлүгүнө көңүл бурду.
Курти Түркия менен Косовонун ортосундагы соода-сатык өсүп жатканын, соода көлөмү 1 миллиард долларга жеткенин, келечекте аны андан ары көбөйтүү максаты коюлганын баса белгиледи.
Косоводогу түрк инвестицияларынын көбөйүшүнө токтолгон Альбин Курти мисал катары Косово өкмөтү менен Улуттук коргоо министрлигине караштуу Машина куруу жана химия өнөр жай корпорациясынын (MKE) кызматташтыгында Гяковада курулуп жаткан ок-дары заводун көрсөттү.
Курти Эрдоган менен жолугушуусунда, өткөн аптада Нидерландиянын Гаага шаарында Косово боштондук армиясынын (KLA) мурдагы командирлери, Косовонун мурдагы президенти Хашим Тачи, Кадри Весели, Рексхеп Селими жана Якуп Красникинин согуш кылмыштары үчүн соттолушун да талкуулаганын кабарлады.
Косовонун премьер-министри Сербиядагы албан коомчулугуна карата уланып жаткан системалуу басмырлоо да каралганын, аймактагы бардык мамлекеттик мекемелерде албандардын жетишсиз өкүлдүк кылынышы күн тарбине коюлганын айтты.
Косово менен Түркия достук мамилелерин тереңдетүүнү, экономикалык жана соода байланыштарын көбөйтүп чыңдоону уланта берерин билдирген Курти Эрдоганды Косового чакырганын маалымдады.
