Орусия бейшемби күнү Түркияга Украина менен тынчтык сүйлөшүүлөрү үчүн платформа түзгөнү үчүн ыраазычылык билдирди, ал эми Тышкы иштер министрлигинин өкүлү Мария Захарова кандайдыр бир сүйлөшүү форматы конкреттүү натыйжаларды берген саясий, дипломатиялык же гуманитардык чечимдерди сунуштаса жарактуу болорун билдирди.
Захарова "Биз сүйлөшүү процессин өткөргөн өлкөлөрдүн демилгелерин же алардын механизмдерин, моделдерин жана муну кантип ишке ашыруу керектиги боюнча концепцияларын ар дайым баалайбыз", - деди.
Түркия сүйлөшүүлөрдү өткөрүүнү бир нече жолу сунуштаган жана төрт жылдан бери уланып жаткан согуш учурунда муну чындап аткарган аз сандагы өлкөлөрдүн бири болуп саналат.
Захарова Украинанын терс позициясына карабастан Москва ар дайым адамдар үчүн гуманитардык маселелерди чечүү жана тынчтыкка карай илгерилөө максатында сүйлөшүүлөрдү жүргүзгөнүн билдирип: "Бирок биз Стамбулдагы сүйлөшүүлөрдү Киев режими саботаж кылганын байкап жатабыз. Акыркы айлампадагы бардык сунуштарыбыз алар тарабынан бөгөттөлгөнүн көрүп турасыздар. Дагы бир жолу ниеттерин билдиргенден кийин тескерисинче кылышты. Тагыраак айтканда эч нерсе кылышкан жок" деди.
"Биз ар дайым ыраазычылык билдиребиз. Ушул учурда түрк тарабына Орусия-Украина сүйлөшүүлөрүн өткөрүү темасындагы меймандостугу жана каалоосуна ыраазыбыз. Бул форматты четке каккан жокпуз. Аны Киев режими четке какты" деп кошумчалады.
Захарова Украина июль айынан бери Орусиянын сунуштарына жооп бербегендиктен сүйлөшүүлөрдү токтотуп койгонун билдирип: “Бул сунуштарга саясий, аскердик жана гуманитардык маселелер боюнча үч жумушчу топ түзүү кирет. Алар ошондой эле делегациянын деңгээлин көтөрүү сунушуна да жооп беришкен жок", - деди.
