Израилдин оппозиция лидери Яир Голан Вашингтондо эки элчилик кызматкеринин өлтүрүлүшүнөн премьер-министр Биньямин Нетаньяху жана өкмөт мүчөлөрүн күнөөлөдү.

Демократтар партиясынын лидери Голан бейшемби күнү билдирүү жасап, Израиль өкмөтүнүн министрлеринин сөздөрү бул окуянын ишке ашуусуна мүмкүнчүлүк түзгөнүн билдирди.

Голан Нетаньяху өкмөтүнүн “антисемитизмди жана Израилге болгон жек көрүүнү күчөткөн тарап” экендигин жана мунун жыйынтыгы катары "дипломатиялык обочолонуунун болуп көрбөгөндөй деңгээли жана дүйнөнүн ар бир жериндеги еврейлер үчүн коркунучтун" пайда болгонун айтты.

Оппозиция лидери өкмөттү алмаштырып, “Израилде жана дүйнөнүн бардык жеринде еврейлер үчүн коопсуздукту түзүү” убадасын берди.

Нетаньяху окуяны "антисемитизмдин жана Израилге каршы жапайы чагымдардын кесепети" экенин айтты.

Нетаньяху Израилдин дүйнөдөгү элчиликтеринде коопсуздук чараларынын күчөтүлө турганын айтты.

Шаршемби күнү кечинде Вашингтондогу Еврей музейинин жанында куралчан адам ок атып, Израиль элчилигинин эки кызматкерин өлтүргөн.

АКШ президенти Дональд Трамп бул окуяны антисемиттик зомбулук деп мүнөздөдү.

Эл аралык коомчулуктун ок атышууну токтотуу чакырыктарын четке каккан Израиль армиясы 2023-жылдын октябрынан бери Газага каршы катуу кол салууларды жасап, көпчүлүгү балдар жана аялдардан турган 53,700гө жакын палестиндикти өлтүрдү.

Эл аралык кылмыш соту былтыр ноябрда Нетаньяху жана анын мурдагы коргоо министри Йоав Галлант тууралуу Газадагы согуш кылмыштары жана адамзатка каршы кылмыштар үчүн камакка алуу ордерин чыгарган.

Израиль бул аймактагы согушуна байланыштуу Эл аралык сотто геноцид боюнча доо менен айыпталууда.