АКШ Кубанын бийлигине жана "аскердик элитасына" каршы экономикалык кысымдын акыркы этабы катары Гавана өкмөтү менен байланышкан сегиз уюм, эки киши жана беш мунай танкерине санкцияларды киргизди.
АКШнын Мамлекеттик департаментинин билдирүүсүндө жаңы санкциялар Кубанын армиясынын "мыйзамсыз" киреше булактарына, энергетикалык камсыздоо байланыштарына, өкмөттүн ичиндеги "элиталарга" жана өлкөнүн куралдуу күчтөрүнө жабдууларды жеткирип жаткан кытайлык коргонуу подрядчыларына багытталганы айтылды.
АКШнын мамлекеттик катчысы Марко Рубио санкциялар боюнча: "Трамптын администрациясы Куба режими аралдын ресурстарын өзүнүн аскердик элитасына буруп жатканда, режимдин мүчөлөрү жана алардын үй-бүлөлөрү бүдөмүк оффшордук тармактардан пайда көрүп жатканда, ошондой эле Куба Америка Кошмо Штаттарына жана анын кызыкчылыктарына каршы коркутуу, тыңчылык кылуу жана кутум уюштуруу үчүн душмандык антиамерикалык актерлордун глобалдык коалициясынын базасы катары кызмат кылууну улантып жатканда карап турбайт", - деп билдирди.
Көрүлгөн чаралардын алкагында, "Sociedad Mercantil Duna S.A." аттуу камсыздоо компаниясы аркылуу Кубанын Куралдуу күчтөрүнө материалдык жана технологиялык колдоо көрсөткөн эки кытайлык мамлекеттик коргонуу подрядчысы санкциялар тизмесине кошулду.
Ошондой эле расмий өкүлдөр Mariel контейнер терминалынын логистикасы жана порт инфраструктурасы үчүн жооптуу мурдагы коммерциялык директору жана аскердик коммерциялык холдинг компаниясы GAESAнын жетекчиси Ания Гильермина Ластрес Мореранын кызы Ани Родригес Ластреске санкцияларды киргизүү чечимин кабыл алышты.
Мындан тышкары Кубага мунай ташыган 5 танкер да АКШнын санкциялар тизмесине киргизилгени айтылды.
Вашингтондун акыркы санкциялар чечиминен кийин Кубанын тышкы иштер министри Бруно Родригес өзүнүн X социалдык медиа аккаунтундагы билдирүүсүндө: "Биз АКШнын экономикалык блокадасынын болуп көрбөгөндөй күчөтүлүшүн, деңиз блокадасына барабар энергетикалык блокаданы жана акыркы 10 айдын ичинде Куба элине экинчи санкциялардын киргизилишин айыптайбыз", - деди.
3-ноябрдагы орто мөөнөттүү шайлоонун алдында АКШнын президенти Дональд Трамп Кубага каршы ыктымалдуу операция тууралуу суралганда: "Бул ийгиликсиз өлкө. Биз жакында ал жакка өз адамдарыбызды кайра жөнөтөбүз", - деп жооп берип, мамлекеттик катчы Марко Рубио арал мамлекетине байланыштуу кырдаалды кылдаттык менен көзөмөлдөп жатканын айткан.
