Иран Израиль менен болгон кагылышуунун коңшу өлкөлөргө жайылышын каалабайт, бирок кырдаал зарыл болуп калса, башка жолго түшүшү мүмкүн. Тышкы иштер министри Аббас Аракчи Ирандын жообу толугу менен өзүн-өзү коргоого негизделгенин айтты.

Аракчи жекшемби күнү Тегеран чет элдик кол салууларга жооп кайтарарын жана бул кол салуулар токтосо, Ирандын реакциясы да токтой турганын айтты.

Тышкы иштер министри Иран Катар менен бөлүшүп турган деңиздеги Түштүк Парс газ кенине Израилдин жасаган чабуулун «ачык агрессия жана өтө коркунучтуу кыймыл» деп мүнөздөдү.

Ал ошондой эле «жаңжалды Перс булуңуна алып баруу стратегиялык жаңылыштык жана анын максаты согушту Ирандын аймагынан ары сүйрөп чыгуу экенин» айтты.

Тышкы иштер министри уланып жаткан Иран-АКШ өзөктүк сүйлөшүүлөрүн Израиль «жолдон чыгарууга» аракет кылып жатканын айтты жана сүйлөшүүлөр келишимге жол ача аларына ишенген.

Тегеран ушул жекшембидеги сүйлөшүүлөрдүн алтынчы айлампасында өз сунушун берүүгө даярданып жаткан, бирок соңку чыңалуудан улам сүйлөшүүлөр токтотулган.

«Израилдин кол салуусу АКШнын макулдугу жана колдоосу болбосо эч качан болмок эмес»,-деген Аракчи, Вашингтондун акыркы кол салууларда эч кандай ролу жок деген сөздөрүнө ишенбегендерин айтты. 

«Кошмо Штаттар өзүнүн ак ниетин далилдегиси келсе, Израилдин Ирандын өзөктүк объектилерине кол салуусун айыпташы керек», - деп кошумчалады ал.

Израилдин кол салууларына Бириккен Улуттар Уюмунун «кайдыгерлиги».

Аракчи Бириккен Улуттар Уюмунун Коопсуздук Кеңешин Израилдин Иранга каршы кандуу чабуулдарына «кайдыгер калганы» менен айыптады.

Мамлекеттик телекөрсөтүүдө көрсөтүлгөн жыйында чет элдик дипломаттар менен сүйлөшкөн Аракчи Израилдин чабуулу Коопсуздук Кеңешинде кайдыгерлик менен кабыл алынганын, Батыш өкмөттөрү Израилдин ордуна Иранды айыптап жатканын айтты.

Ирандын башкы дипломаты Тегеран ишемби күнү БУУнун өзөктүк курал боюнча көзөмөл органы менен кызматташууну чектөөгө убада бергенден кийин Израилдин өзөктүк объектилерге кол салуусу «жаңы кызыл сызыктан өткөнүн» баса белгиледи.

«Израиль режими өзөктүк маселе боюнча эч кандай келишимди каалабай турганы ачык эле көрүнүп турат. Сүйлөшүүлөрдү каалабайт жана дипломатияны издебейт», - деди ал.

Эки башкы душмандын ортосундагы эң катуу кагылышуу Тегеран менен Вашингтондун сүйлөшүүлөрү Ирандын өзөктүк программасы боюнча келишимге жетишүү уланып жаткан учурга туш келди. 

Израилдин чабуулдарынан мурда эки тарап жекшемби күнү Оманда сүйлөшүүлөрдүн алтынчы айлампасын өткөрүшмөк.

Ирандын президенти Масуд Пезешкиан ишемби күнү Израилдин чабуулдары токтомоюнча Тегеран АКШ менен өзөктүк сүйлөшүүлөргө катышпай турганын билдирди.