Түркиянын президенти Режеп Таййип Эрдоган, Израиль менен палестиналык каршылык көрсөтүү уюму ХАМАСтын ортосунда Шарм-эль-Шейхте өткөрүлгөн сүйлөшүүлөрдөн кийин жетишилген ок атышууну токтотуу келишимине канааттанганын билдирди. Бул процессте Түркия да чоң роль ойноду.
Эрдоган бейшемби күнкү билдирүүсүндө, Израиль өкмөтүн ок атышпоо келишимине үндөш үчүн керектүү саясий эркти көрсөткөн АКШнын президенти Дональд Трампка жана келишимге жетишүүгө олуттуу колдоо көрсөткөн Катар менен Египетке ыраазычылыгын билдирди.
Президент Эрдоган Түркиянын келишимдин так аткарылышын жакындан көзөмөлдөй турганын жана процесске салым кошууну уланта турганын айтты.
Эрдоган ошондой эле: “1967-жылдагы чек араларга негизделген борбору Чыгыш Кудс болгон көз карандысыз, суверендүү жана географиялык жактан бирдиктүү Палестина мамлекети түзүлгөнгө чейин күрөшүбүздү улантабыз”,-деди.
Акыркы эки жылда чоң азап жана жоготууларга учураган палестиналыктарга тилектештигин билдирген Эрдоган, алар оор шарттарга карабастан каршылык көрсөткөндөрүн баса белгиледи.
Келишимдин чоо-жайы тууралуу Reuters агенттигине маалымат берген булак, Трамптын Газа планынын биринчи баскычына байланыштуу келишимге бейшемби күнү саат 09:00да кол коюла турганын айтты.
Булак, келишимге кол коюлгандан кийин Газада ок атышпоонун күчүнө кирерин кабарлады. The Jerusalem Post гезити Катар, Египет, АКШ жана Түркиянын Газа тынчтык келишиминин кепилдери катары кол койгондорун маалымдады.
Израиль менен ХАМАС көптөн бери күтүлгөн ок атышпоо келишимине жетишкенин билдиришти. Бул келишим Тель-Авивдин Газага каршы согушун токтотуу боюнча Трамптын планынын биринчи этабы болуп саналат. Бул согуш 67,000ден ашуун палестиналыктын өмүрүн алды.
Келишим үч негизги пунктту камтыйт: израилдик туткундарды жана палестиналык туткундарды бошотуу, Израиль аскерлерин белгиленген чекке чыгарып кетүү жана согуштан кийин Газага өтө зарыл болгон жардамды тез арада жеткирүү.
