Президент Режеп Таййип Эрдоган, Европа элин 9-май Европа күнү менен куттуктады.
Түркиянын Коммуникация директорлугунун социалдык медиа эсебинен берилген маалыматка караганда президент Эрдоган куттуктоосунда Европа күнүнүн 1950-жылы Шуман декларациясы менен башталган Европанын саясий жана экономикалык интеграция процессинин символу экендигин белгиледи.
Европа интеграцияcын камтыган Европа Биримдигинин акыркы жылдарда көп өлчөмдүү глобалдык жана аймактык кыйынчылыктарга туш болгонун баса белгилеген Эрдоган: "Европанын коопсуздук архитектурасынын келечеги талкууланууда; Газада 19 айдан бери уланып жаткан кыргынга көз жумуп коюу, Израилдин кол салууларын токтото турган натыйжалуу саясатты иштеп чыга албагандык Биримдиктин баалуулуктарынын суракка алынышына алып келүүдө",- деди.
Эрдоган Европа Биримдигине бүгүн көрөгөч жана тайманбас көз караштын керек экендигин белгилеп, төмөнкүлөрдү айтты: "Бул оор мезгилде өзүнүн айрым мүчөлөрүнүн кызыкчылыктарына туткун болбогон, континенттин жалпы кызыкчылыктарына басым жасаган, инклюзивдүү жана бириктирүүчү Европа Биримдиги баарынын кызыкчылыгына жооп берет. Кездешкен бардык тоскоолдуктарга карабастан Европа Биримдигине мүчөлүккө талапкер өлкөбүз, кризис жана кагылышууларда жүргүзгөн гумандуу, тынчтыкчыл жана конструктивдүү саясаты, сунуш кылган адилеттүү чечимдери менен Биримдиктин сакталышы үчүн да кепил боло алат»,- деди.
"Акыркы мезгилде бүткүл дүйнөгө таасир этип, салттуу саясатты кайра карап чыгууга себеп болгон трансатлантикалык жана глобалдык өнүгүүлөр Түркия менен Биримдиктин ортосундагы мамилелердин маанисин дагы бир жолу көрсөттү.
Европа Биримдиги институттарын өкүлдүк кылам деген кээ бир инсан жана топтордун өлкөбүзгө карата мезгил-мезгили менен жасаган адилетсиз мамилесине карабастан, Биримдик алдыбыздагы мезгилде узак мөөнөттүү жана стратегиялык перспектива менен өз ара пайданын негизинде кыймылдай турган көрөгөчтүктү көрсөтөт деп ишенем. Ушул мүмкүнчүлүктөн пайдаланып, биринчи кезекте өз жарандарымды, ошондой эле Европа элдерин Европа күнү менен куттуктайм", - деди Эрдоган.
