Азербайжандын Президенттик аппаратынын билдирүүсүнө ылайык, борбор калаа Бакуга барган юстиция министри Акын Гүрлек президент Илхам Алиев тарабынан кабыл алынды.
Министр Гүрлек президент Режеп Таййип Эрдогандын саламын Алиевге жеткирди, Алиев да саламынан улам Эрдоганга ыраазычылык билдирди.
Гүрлек орток тарых, маданият жана бир туугандыкка негизделген Түркия-Азербайжан алакалары эки өлкөнүн лидерлеринин ортосундагы жылуу мамиленин аркасында күндөн-күнгө бекемделип жатканын айтты.
Президент Алиевдин жетекчилиги астында Азербайжандын олуттуу өнүгүү процессин башынан өткөрүп жатканын баса белгилеген Гүрлек, өлкөнүн экономикалык өнүгүшүнө, эл аралык кадыр-баркынын жогорулашына жана Карабахта жетишилген тарыхый жеңишке көңүл бурду.
"Түркия Азербайжанды колдоону улантат"
Гүрлек Азербайжан аймактагы энергетика, транспорт жана байланыш долбоорлору, ошондой эле Зангезур коридору сыяктуу стратегиялык демилгелерди ишке ашырууда маанилүү ролду ойногонун баса белгилеп, Түркиянын Азербайжанды колдоону уланта берерин айтты.
Жолугушууда Түркия менен Азербайжандын ортосундагы бир туугандык жана союздаштык мамилелердин бардык тармактарда ийгиликтүү өнүгүшүнө канааттануу билдирилди.
Тараптар эки өлкөнүн юстиция министрликтеринин ортосундагы жемиштүү кызматташтыкты андан ары өнүктүрүү боюнча пикир алмашышты.
