Түркиянын Коммуникация башкармалыгы, глобалдык башкаруу реформасы боюнча диалогду шыктандыруу максатында 20 өлкөдө дымактуу бир катар эл аралык панелдерди баштады.

«Адилеттүү дүйнө мүмкүн» деген темадагы бул демилге өлкөнүн Stratcom Public Forum программасынын алкагында ишке ашырылууда.

Австрия, Швейцария, Венгрия, Нидерландия жана Германиядагы акыркы сессиялардан кийин бул серия Римде уланды. Алдыдагы мезгилде болсо Европанын маанилүү борборлорунда форумдардын өткөрүлүшү пландалууда..

«Президент Эрдогандын «дүйнө бештен чоң» деген билдирүүсү эл аралык системаны адилеттүүлүктүн негизинде кайра курууга күчтүү чакырык болуп саналат», – деди Түркиянын Коммуникация башкармалыгынын башчысы Фахреттин Алтун видео кайрылуусунда.

«Беш» деген сөз БУУнун Коопсуздук Кеңешинин туруктуу мүчөлөрү – АКШ, Улуу Британия, Франция, Орусия жана Кытайды билдирет.

Бул демилге Түркиянын глобалдык дипломатиялык талкууларга, өзгөчө БУУнун реформасына байланыштуу таасирин күчөтүү аракеттерин чагылдырат. Президент Эрдогандын жетекчилиги астында Түркия эл аралык мекемелерди көбүрөөк инклюзивдүү кылуу үчүн кайра түзүүнү дайыма жактап келет.

Эмки кадамдар кандай?

Панелдердин сериясы февраль айынын ичинде улантылып Британия, Польша, Бельгия жана Францияда сессиялар өткөрүлөт.

Алтун форумдардын өкмөттөр, жарандык коомдук уюмдар, медиа мекемелери жана аналитикалык борборлордун ортосундагы диалогду жеңилдетүүнү максат кылганын баса белгиледи.

«Биз көйгөйлөргө гана эмес, чечүү жолдоруна да көңүл бурабыз», – деген Алтун Түркия «коллективдүү эл аралык аракеттер аркылуу адилеттүү дүйнө мүмкүн экенине бекем ишенет» деп кошумчалады.