Кытайдын Соода министрлиги, Европа Биримдигинен (ЕБ) медициналык аппараттарды сатып алууну чектегенин билдирди. Бул чечим европалык компаниялардын жүз миллиондогон долларлык медициналык жабдууларды сатуусуна таасир этиши мүмкүн.
Бээжин 6.3 миллион доллардан ашкан кандайдыр бир сатып алуу буйрутмасы бекитилбей турганын айтты. Өткөн айда Брюссель да окшош чектөөлөрдү киргизген.
Бээжин менен Брюсселдин ортосундагы чыңалуу күчөп жатат. Европа Биримдиги Кытайда өндүрүлгөн электр унааларына тарифтерди киргизсе, Кытай Евробиримдиктен импорттолгон коньякка кошумча салык киргизди.
Европа Биримдиги өткөн айда кытайлык компанияларга жылдык 70 миллиард доллар же андан көп суммадагы медициналык шаймандар үчүн мамлекеттик тендерлерге катышуусуна тыюу салганын жарыялап, Евробиримдиктин компаниялары Кытайга адилеттүү кирүү мүмкүнчүлүгүнө ээ эмес деп тапкан.
Европа Комиссиясы жарыялаган чара Евробиримдиктин 2022-жылы күчүнө кирген Эл аралык сатып алуулар боюнча механизминин алкагындагы биринчи чечим болду жана өз ара рынокко жетүүнү камсыз кылууга багытталган.
Кытайдын каршы чаралары күтүлгөн эле, анткени өткөн айдын аягында анын Соода министрлиги ЕБнин кадамына каршы "зарыл чараларды" көрөрүн билдирген.
Соода министрлиги жекшемби күнкү өзүнчө билдирүүсүндө "Тилекке каршы Кытайдын ак ниеттүүлүгүнө жана чын ыкластуулугуна карабастан ЕБ өз жолунда чектөөчү чараларды көрүп, жаңы протекционисттик тоскоолдуктарды түзүп жатат... Ошондуктан Кытайдын өз ара чектөөчү чараларды көрүүдөн башка аргасы жок", - деди.
Бээжиндеги ЕБ делегациясынын кеңсеси комментарий берүү өтүнүчүнө дароо жооп берген жок.
Кытайдын Соода министрлиги Кытай ошондой эле келишимдин наркынын 50% дан ашыгы ЕБ компоненттеринен турган медициналык шаймандарды башка өлкөлөрдөн импорттоого чектөө коет деп билдирди. Бул чаралар жекшемби күнү күчүнө кирет.
Соода министрлиги Кытайдагы европалык компаниялардын продукциялары бул чаралардан таасирленбей турганын айтты.
Дүйнөдөгү экинчи жана үчүнчү ири экономикалар июль айынын аягында Кытайда лидерлер саммитин өткөрүүгө даярданууда.
Жума күнү Кытай ЕБден келген брендиге, анын ичинде Франциядан чыккан коньякка, беш жыл бою 34,9% чейин бажы төлөмдөрүн киргизгенин жарыялады. Бул чечим негизинен Европанын электр унааларына тарифтерине жооп катары кабыл алынган деп эсептелүүдө.
Бирок ири коньяк өндүрүүчүлөр Pernod Ricard, LVMH жана Remy Cointreau бул төлөмдөрдөн бошотулду, эгерде алар Кытай тарабынан ачык айтылбаган минималдуу баада сатышса.
