Израилдик маалымат каражаттарынын билдирүүсүнө караганда, премьер-министр Биньямин Нетаньяху Египеттин аскердик дарамети өсүп жатканын жана аны тыкыр көзөмөлдөө керектигин, ошондой эле АКШнын президенти Дональд Трамптын Иран боюнча акыркы чечими кандай болорун билбей турганын айтты.
Israel Hayom гезити Нетаньяхунун бейшемби күнү Кнессеттин Тышкы иштер жана коргонуу комитетинин жабык жыйынында Египеттин кеңейип жаткан аскердик күчү боюнча кооптонуусун ортого салганын билдирди. Нетаньяху: «Египет армиясы күчүн арттырууда жана буга көз салуу зарыл. Египет менен карым - катнашыбыз бар, бирок аскердик күчтүн ашыкча топтолушуна жол бербешибиз керек», — деди.
Гезиттин булактарынын маалыматы боюнча, бул билдирүүлөр Израиль менен Египеттин ортосундагы мамилелердин сезимталдыгы боюнча талкуулар учурунда айтылган.
Бул эскертүүгө карабастан, Израиль менен Египет декабрь айында болжол менен 35 миллиард долларлык ири газ келишимине кол коюшкан. Ошол учурда Нетаньяху өкмөтү келишимди бекиткенин жарыялап, аны Израилдин тарыхындагы эң ири келишим деп мүнөздөгөн.
Аймактык чыңалуу күчөп жатат
Channel 12 телеканалынын кабарына караганда, ошол эле комитеттин жыйынында Нетаньяху Иран маселесин жана Израилдин АКШ менен координациясын да талкуулады.
Кабарга ылайык, Нетаньяху Вашингтон менен координациянын "мүмкүн болгон эң жогорку деңгээлде" экенин айтса да Трамптын Иран боюнча акыркы позициясында белгисиздиктин бар экенин моюнга алды.
Депутаттарга кайрылган Нетаньяху Ирандын башкаруу системасынын кыйрашына алып келе турган критикалык этап үчүн шарттардын түзүлгөнүн айтты, бирок мындай процесстин Тегеран өкмөтүнүн кулашы менен аяктайбы же жокпу, аны билбей турганын кошумчалады.
Нетаньяху, эгер кол салууга дуушар болушса, Израилдин Иранга каршы "чоң жана абдан катуу" сокку урууга даяр экенин, бериле турган кандайдыр бир жооптун июнь айында жасалган чабуулдардын масштабынан чоң болорун белгиледи.
Ант ичкен душмандар
Тараптар июнь айында 12 күнгө созулган согушта беттешкен.
Кагылышуу Израилдин Ирандын аскердик жана өзөктүк объектилерине, ошондой эле жарандык аймактарына жасаган мурда болуп көрбөгөндөй чабуулу менен башталган.
АКШ да Ирандын 3 өзөктүк объектисине сокку уруу менен операцияларга катышкан; андан соң Трамп тарабынан демилгеленген ок атышууну токтотуу келишими күчүнө кирген.
2024-жылдын апрель айында Газада Израилдин геноциди учурунда, Иран Дамасктагы консулдугуна жасалган кол салуудан өч алуу катары, буга чейин болбогон дрон жана ракеталар менен чабуул баштаган.
Айлар өткөндөн кийин, 1-октябрда Иран Хамас жана Хизболлах лидерлеринин өлтүрүлүшүнө жооп иретинде Израилге 200 ракета аткан.
