Израилдин коргоо министри, Хамас Газадагы ок атышпоо келишимине баш ийбесе геноцидди кайра баштай тургандарын жана армияга Палестинанын каршылык уюмун «талкалоо» планын даярдоо буйругун бергенин айтты.
“Эгер ХАМАС келишимди аткаруудан баш тартса, Израиль Хамасты толугу менен жеңүү, Газадагы абалды өзгөртүү жана согуштун бардык максаттарына жетишүү үчүн АКШ менен координацияланып согушуп, кайрадан чара көрөт”, – деп шаршемби күнү Кацтын кеңсеси билдирүү таратты.
Кац ошондой эле Израиль АКШ жетектеген эл аралык күчтөр менен биргеликте Газадагы туннелдерди жок кылуу боюнча иш алып барарын, бул аскердик максаттардын негизги багыты экенин белгиледи.
Бул жарыядан мурда Хамастын куралдуу канаты Кассам бригадасы Израилдин аба соккуларынан каза болгон эки израилдик туткундун сөөктөрүн тапшырганын билдирген. Палестиналык уюм калган сөөктөрдү табуу үчүн “чоң күч жана атайын жабдуулар” керек экенин, бул ишти толук бүтүрүү үчүн аракет кылып жатышканын кошумчалады.
‘Кайра башталышы мүмкүн’
Эки тарап тең АКШ, Катар, Түркия жана Египет ортомчулук кылган ок атышпоо келишимин сактоого аракет кылууда.
АКШ президенти Дональд Трамп Вашингтондо ХАМАС келишимдин шарттарын аткарбаса, Израиль Газадагы кыргынды “бир заматта” кайра башташы мүмкүн экенин эскертти.
“Эгер Израиль кааласа эки жылдык согуш учурунда ХАМАСты талкалап салмак”, – деген Трамп, анын администрациясы ок атышуунун аткарылышын тыкыр көзөмөлдөп жатканын кошумчалады.
Өткөн жумада жетишилген ок атышпоо келишими израилдик туткундарды палестиналык туткундарга алмаштыруу жана Израиль күчтөрүнүн Газадан акырындык менен чыгышын камтыйт. Бирок ок атышуу токтотулгандан кийин да Израиль палестиналыктарды өлтүрүүнү улантты.
Жаңжалды жөнгө салуу боюнча ортомчулар келишимдин кийинки этабын камсыз кылуу жана Израилдин Газадагы согушун кайра баштоосуна жол бербөө үчүн аракеттерин улантып жатышат.
